निवडणुका संपल्यानंतर पेट्रोल आणि डिझेलच्या किमतींमध्ये सातत्याने वाढ सुरू असून गेल्या नऊ दिवसांत लिटरमागे इंधनाच्या दरात ७० ते ८० पैशांनी वाढ झाली आहे. पेट्रोलच्या दरामध्ये मंगळवारी ११ पैसे आणि डिझेलच्या दरांमध्ये ५ पैशांनी वाढ झाली आहे. लोकसभा निवडणुकीसाठी मतदानाचे सात टप्पे संपल्यानंतर २० मेपासून लगेचच इंधनाच्या किमतींमध्ये वाढ सुरू झाली आहे. २० मेपासून पेट्रोलच्या दरांमध्ये आतापर्यंत ८३ पैशांनी वाढ झाली आहे, तर डिझेलच्या दरांमध्ये ७३ पैशांनी वाढ झाली आहे. जागतिक स्तरावर इंधनाच्या दरांमध्ये वाढ होऊनही एप्रिल आणि मे महिन्यामध्ये देशात पेट्रोल-डिझेलच्या किमतींमध्ये फारशी वाढ झाली नव्हती. लोकसभा निवडणुकाच्या प्रचाराचा आणि मतदानाच्या विविध टप्प्यांचा हा कालावधी होता. मात्र, २० मे रोजी मतदानाचे सर्व टप्पे संपल्यानंतर इंधनाच्या किमतींमध्ये वाढ होण्यास सुरुवात झाली आहे. पेट्रोलच्या दरामध्ये मंगळवारी ११ पैशांनी वाढ झाली, तर डिझेल पाच पैशांनी महागले. दिल्लीमध्ये पेट्रोलचे दर लिटरमागे ७१.८६ रुपये झाले आहेत. १९ मे रोजी हेच दर ७१.०३ रुपये इतके होते. दिल्लीमध्ये डिझेलचे दर ६५.९६ रुपयांवरून ६६.६९ रुपये इतके झाले आहेत. मुंबईमध्ये पेट्रोल आता ७७.४७ रुपयांवर पोहोचले असून डिझेल ६९.८८ रुपयांवर पोहोचले आहे.
‘इंडियन ऑइल कॉर्पोरेशन’, ‘भारत पेट्रोलियम’ आणि ‘हिंदुस्तान पेट्रोलियम’ या कंपन्यांनी दोन महिने इंधनाच्या दरांमध्ये अजिबात वाढ केली नव्हती. इंधनवाढीचा फटका त्यांनी ग्राहकांना बसू दिला नव्हता. मात्र, आता ते इंधनदरांमध्ये वाढ करून झालेले नुकसान कंपन्या भरून काढत आहेत. बॅरलमागे पाच डॉलरने वाढ झाल्यानंतरही कर्नाटक निवडणुकीच्या पार्श्वभूमीवर मे २०१८मध्ये जवळपास १९ दिवस इंधनाच्या दरात वाढ करण्यात आली नव्हती. निवडणूक संपताच इंधनाच्या दरांमध्ये वाढ झाली. तसेच, डिसेंबर २०१७मध्ये गुजरात विधानसभा निवडणुकीच्या दरम्यानदेखील १४ दिवस इंधनाच्या दरांमध्ये बदल करण्यात आला नव्हता. पंजाब, गोवा, उत्तराखंड, उत्तर प्रदेश, मणिपूर राज्यांतील निवडणुकांदरम्यानदेखील १६ जानेवारी २०१७ ते १ एप्रिल २०१७ या कालावधीमध्ये कंपन्यांनी इंधनाच्या दरांमध्ये फारसा बदल झाला नाही.
इंधनदर ‘जैसे थे’चा कालावधी
लोकसभा निवडणूक एप्रिल-मे २०१९
कर्नाटक निवडणूक मे २०१८ (१९ दिवस)
गुजरात निवडणूक डिसेंबर २०१७ (१४ दिवस)
पंजाब, गोवा, उत्तराखंड
उत्तर प्रदेश, मणिपूर
निवडणूक १६ जाने. ते १ एप्रिल २०१७
सातव्या टप्प्यानंतरच वाढ सुरू
लोकसभा निवडणुकीसाठी मतदानाचे सात टप्पे संपल्यानंतर २० मेपासून लगेचच इंधनाच्या किमतींमध्ये वाढ सुरू झाली आहे. २० मेपासून पेट्रोलच्या दरांमध्ये आतापर्यंत ८३ पैशांनी वाढ झाली आहे, तर डिझेलच्या दरांमध्ये ७३ पैशांनी वाढ झाली आहे. जागतिक स्तरावर इंधनाच्या दरांमध्ये वाढ होऊनही एप्रिल आणि मे महिन्यामध्ये देशात पेट्रोल-डिझेलच्या किमतींमध्ये फारशी वाढ झाली नव्हती. लोकसभा निवडणुकाच्या प्रचाराचा आणि मतदानाच्या विविध टप्प्यांचा हा कालावधी होता. मात्र, २० मे रोजी मतदानाचे सर्व टप्पे संपल्यानंतर इंधनाच्या किमतींमध्ये वाढ होण्यास सुरुवात झाली आहे.