नवी मुंबई येथून चोरलेली बीएमडब्ल्यू कार व कार चोरट्यास श्रीरामपूर शहरात पकडण्यात आले. मंगळवारी रात्री रात्रगस्ती दरम्यान संशय आल्यानंतर पोलिसांनी कार व चोरट्यास ताब्यात घेतले. गगन अशोक पाटील (रा. बदलापूर, नवी मुंबई) असे पकडलेल्या आरोपीचे नाव आहे.
मंगळवारी रात्री श्रीरामपूर शहर पोलिस स्टेशनचे पोलिस निरीक्षक श्रीहरी बहिरट, पोलिस कॉन्स्टेबल सुनील दिघे, अर्जुन मोकळे, पंकज गोसावी हे श्रीरामपूर शहरात रात्रगस्त घालत होते. रात्रीच्या वेळी बीएमडब्लू कार संशयितरित्या फिरत असल्याने पोलिसांना संशय आला. गाडीचे मुंबई पासिंग असल्याने पोलिसांनी वाहनचालकाला थांबवून विचारपूस केली. चालक गगन पाटील हा उडवाउडवीची उत्तरे देत असल्याचे लक्षात आल्याने पोलिसांनी त्याला चौकशीसाठी ताब्यात घेतले. चौकशीदरम्यान गगन अशोक पाटील याने नवीन मुंबई येथून कार चोरल्याची कबुली दिली. त्यानंतर श्रीरामपूर पोलिसांनी नवी मुंबईतील एमपीएमसी पोलिस स्टेशनकडून याबाबत माहिती घेतली. त्यात अनुप रमेश वेदांतवार यांची बीएमडब्लू कार चोरीला गेल्याचा गुन्हा दाखल असल्याची माहिती मिळाली.