मोबाइलवर फोन करून सँडविचची होम डिलिव्हरी करतो, असे सांगून ओळख वाढवून तरुणीवर अत्याचार करणाऱ्या आरोपीला ठाणे न्यायालयाने कोठडी सुनावली आहे. ठाणे सत्र न्यायालयात या प्रकरणी सोमवारी सुनावणी झाली.
चेंबूरच्या मस्का चाळीत राहणाऱ्या राकेश धुमक याचा सँडविचविक्रीचा व्यवसाय आहे. त्यातून त्याची वाशी येथे राहणाऱ्या २१ वर्षीय पीडितेशी ओळख झाली. त्याने पीडितेचा मोबाइल क्रमांक मिळवून तिच्याशी मैत्री केली होती. त्यातून एकत्र काढलेला फोटो फेसबुकवर व्हायरल करण्याची धमकी देऊन राकेशने पीडित तरुणीला मोटारसायकलवरून ठाण्यातील लॉजवर नेत १५ मे रोजी तिच्यावर अत्याचार केला होता. या प्रकरणी पीडित तरुणीने ठाणेनगर पोलिस ठाण्यात धाव घेत त्याच्याविरोधात गुन्हा दाखल केला असता पोलिसांनी राकेशला अटक केली होती. त्याला पाच दिवसांच्या पोलिस कोठडीनंतर सोमवारी न्यायालयात हजर केले असता १४ दिवसांची न्यायालयीन कोठडीत त्याची रवानगी करण्यात आली.