कंजारभाट समाजाची अंबरनाथ पोलिस ठाण्यावर धडक

टाकलेल्या बहिष्काराप्रकरणी अंबरनाथ पोलिस ठाण्यामध्ये जात पंचायतीच्या सदस्यांविरोधात गुन्हा दाखल केला होता. मात्र या गुन्ह्याविरोधात कंजारभाट समाजाच्या महिलांनी गुरुवारी संध्याकाळी अंबरनाथ पोलिस ठाण्यावर मोर्चा काढत हे गुन्हे रद्द करण्याची मागणी केली आहे.

राज्यात कंजारभाट समाजाच्या कौमार्य चाचणीची काही प्रकरणे समोर येत असताना, अंबरनाथ येथील विवेक तमायचीकर या तरुणाने विवाह करण्यापूर्वी कौमार्य चाचणीला विरोध केला होता. या प्रकरणात कंजारभाट समाजाच्या जात पंचायतीने विवेकच्या आजीच्या अंत्ययात्रेला न जाण्याचे आवाहन कंजारभाट समाजाला केले होते. या प्रकरणी विवेक तमायचीकर या तरुणाने अंबरनाथ पोलिस ठाण्यामध्ये जात पंचायतीच्या सरपंचासह चार सदस्यांवर बहिष्कार प्रतिबंधक आणि निवारणाच्या कलमांखाली गुन्हा दाखल केला होता. या प्रकरणात अद्याप पोलिसांनी एकाही आरोपीला अटक केली नसून, या घटनेत पुराव्यांच्या मदतीने चौकशी केल्यानंतर संबंधित आरोपींना अटक करण्यात येणार असल्याचे पोलिसांनी सांगितले. परंतु जातपंचायतीच्या चार सदस्यांवर गुन्हा दाखल होताच कंजारभाट समाजाकडूनही या प्रकरणी प्रतिक्रिया उमटल्या आहेत. गुरुवारी संध्याकाळी कंजारभाट महिलांनी अंबरनाथ पोलिस ठाण्यावर धडक दिली होती. आमच्या समाजात कुठल्याही तरुणीची विवाहापूर्व कौमार्य चाचणी केली जात नसल्याचा दावा यावेळी उपस्थित महिला करत होत्या. विवेक तमायचीकर या तरुणाने समाजाची प्रतिमा खोटे आरोप करत मलीन केली आहे. तसेच, विवेकच्या आजीच्या अंत्ययात्रेवर कोणत्याही व्यक्तीने बहिष्कार घातला नसल्याचेही यावेळी कंजारभाट समाजाच्या महिलांनी सांगितले. विवेकने कंजारभाट समाजाच्या जात पंचायतीच्या सदस्यांविरोधात खोटे गुन्हे दाखल केले असून, पोलिसांनी हे गुन्हे मागे घेण्याची मागणी अंबरनाथ पोलिस ठाण्याचे वरिष्ठ पोलिस निरीक्षक सुनिल घुगे यांच्याकडे केली. त्याबाबतचे निवेदन त्यांनी वरिष्ठ पोलिस निरीक्षकांना दिले. तसे न झाल्यास समाजाकडूनही विवेकविरोधात गुन्हे दाखल करण्यात येतील, असा इशारा यावेळी मोर्चातील महिलांनी दिला आहे. या प्रकरणी न्याय न मिळाल्यास कंजारभाट समाजाकडून तीव्र आंदोलन छेडत न्यायालयातही धाव घेतली जाईल, असेही यावेळी महिलांनी सांगितले.