दातांची शस्त्रक्रिया करताना अती रक्तस्राव झाल्याने तरुणीचा मृत्यू झाला. पिंपरी-चिंचवडमधील स्टर्लिंग हॉस्पिटलमध्ये ही घटना घडली. या प्रकरणी डॉक्टर दाम्पत्यावर निष्काळजीपणा केल्याचा आरोप तरुणीच्या नातेवाइकांनी केला आहे. याबाबत निगडी पोलिसांकडे तक्रार करण्यात आली आहे. धनश्रीच्या बहिणीचे लग्न एक महिन्यावर येऊन ठेपले असताना ही घटना घडल्याने कुटुंबावर मोठा दु:खाचा डोंगर कोसळला.
धनश्री जाधव (वय २३) असे मृत्यू झालेल्या तरुणीचे नाव आहे. या प्रकरणी स्टर्लिंग आयुर्वेदिक हॉस्पिटलमधील प्रशासनाने हात वर केल्याची तक्रार कुटुंबीयांनी केली. दुसरीकडे याबाबत आरोप करण्यात आलेल्या डॉ. पाटील दाम्पत्याने या प्रकरणातील चौकशीसाठी सहकार्य करू, अशी भूमिका घेतली आहे.
गेल्या काही वर्षांपासून धनश्री डॉ. पाटील यांच्याकडे उपचार घेत होती. २४ एप्रिल रोजी तिच्या दातांवर डॉ. पाटील दाम्पत्याने शस्त्रक्रिया केली. परंतु, शस्त्रक्रिया करताना मोठ्या प्रमाणावर रक्तस्राव झाला. त्यानंतर ती कोमात गेल्याचे सांगण्यात येत असून, त्याच वेळी तिला अर्धांगवायूचा झटकाही आला होता. तिच्या मेंदूमध्ये रक्तपुरवठा होत नव्हता. अखेर शनिवारी ती कोमात गेल्यापासून ११ दिवसांनी तिचा मृत्यू झाला.
धनश्रीच्या दातांची शस्त्रक्रिया ऑक्टोबर महिन्यात होणार होती. ऐन वेळी भूल देण्याअगोदर धनश्रीला औषधांची रिअॅक्शन आल्याने तिला तातडीने अतिदक्षता विभागात दाखल करावे लागले. त्यामुळे त्या वेळी स्थगित करावी लागलेली तिची शस्त्रक्रिया मागील आठवड्यात पार पडली. या दरम्यान अतिरक्तस्रावामुळे गुंतागुंत झाल्याने ती कोमात गेली होती. शवविच्छेदनाच्या अहवालात काही संशयास्पद आढळल्यास संबंधित डॉक्टरांवर गुन्हा दाखल करण्यात येईल, अशी माहिती निगडी पोलिस ठाण्याचे निरीक्षक राजेंद्र निकाळजे यांनी दिली.
ही दुर्दैवी घटना आहे. शक्यतो असे घडत नाही. मोठी शस्त्रक्रिया असल्याने आम्ही सर्वतोपरी काळजी घेतली होती. जाधव कुटुंबाच्या दुःखात सहभागी असून, याबाबतच्या चौकशीसाठी सर्वतोपरी सहकार्य करू. माझ्याकडून कोणत्याही प्रकारचा हलगर्जीपणा झालेला नाही.
– डॉ. राम पाटील
. डॉ. पाटील दाम्पत्य आउटसोर्स युनिट ऑफ डेंटल विभागाचे आहेत. त्यांचा आणि स्टर्लिंग हॉस्पिटलचा कोणत्याही प्रकारचा संबंध नाही.
– डॉ. धर्मेश गांधी, मुख्य वैद्यकीय अधिकारी, स्टर्लिंग हॉस्पिटल