सत्तरच्या दशकातली प्रसिद्ध अभिनेत्री मुमताज यांच्या निधनाची बातमी सोशल मीडियावर व्हायरल होत आहे. तिच्या कुटुंबीयांनी मात्र ही बातमी खोटी असल्याचं स्पष्ट केलं आहे. सोबतच अशा अफवा पसरवणं बंद करा, असं आवाहन केलं आहे.
मुमताज या सध्या त्यांच्या कुटुंबीयांसमावेत लंडन शहरात वास्तव्यास आहेत. २०१८ च्या एप्रिल महिन्यातही मुमताज यांच्याबद्दल अश्याच अफवा पसरवण्यात आल्या होत्या. तेव्हाही मुमताज यांची धाकटी मुलगी तान्या हिनं ही बातमी खोटी असल्याचं सांगितलं होतं.
मागील आठवड्यात एका ट्विटमुळं पुन्हा एकदा मुमताज यांच्या निधनाची अफवा पसरू लागली. ‘मुमताज आंटी जिवंत आणि पूर्णपणे सुदृढ आहे. आत्ताच तिचा भाचा शाद रंधावा याच्यासोबत माझं बोलणं झालं. तिच्या निधनाच्या अफवा बंद झाल्या तर तिला बरं वाटेल,’ असं ट्विट निर्माता मिलाप यांनी आपल्या ट्विटरवरून केलं आहे.