मुलगा तेरा वर्षांनंतर अमेरिकेहून घरी आला आणि मुलाला पाहून आईच्या डोळ्यांतून घळाघळा आनंदाश्रू ओघळू लागले. आईने मुलाची गळाभेटही घेतली. मात्र, पुढच्याच क्षणी मुलाने आईला झिडकारले आणि जोरात कानशिलात लगावली. मुलाने आपल्याला का मारले, ते भेदरलेल्या आईला समजले नाही. मुलगा एवढे करून थांबला नाही. त्याने, आईला मनोरुग्ण ठरवून तिची थेट मांजरी येथील जागृती मनोरुग्णालयात रवानगी केली. मुलाने आई राहत असलेल्या फ्लॅटचा ताबा मिळविण्यासाठी हे कृत्य केल्याचे समोर आले आहे.
मगरपट्टा येथील ‘कुमार पॅरेडाइज’ इमारतीमध्ये मुलाची आई (वय ६५) राहते. मुलगा सन २००६ मध्ये नोकरीनिमित्त अमेरिकेला गेला. मधल्या काळात २०१०मध्ये त्याचे वडील घर सोडून गेले. तेव्हापासून आई एकटीच राहते. आईने आपल्या एकुलत्या एक मुलाला खूप शिकवले. उच्चशिक्षित मुलाला २००६मध्ये अमेरिकेतील कंपनीमध्ये नोकरी लागली. ‘माझा मुलगा अमेरिकेत नोकरी करतो,’ असे ही माऊली मोठ्या अभिमानाने सांगत असे. या मुलाचे लग्न झाले असून, त्याला एक मुलगीही आहे. मुलाने गेल्या वर्षी घरी येणार असल्याचे आईला फोनवर सांगितले होते. मात्र, त्या वेळी तो आला नाही. गेल्या २३ एप्रिलला तो परत आला.
तेरा वर्षांनंतर घरी आलेल्या मुलाला पाहून आईचा आनंद गगनात मावेना. तिने प्रेमाने त्याची गळाभेट घेतली. मात्र, त्याने आईला झिडकारले आणि दोन कानशिलात लगावल्या; तसेच शिवीगाळ करून, ‘तू काहीही बोलतेस, तुझे मानसिक संतुलन बिघडले आहे. तुला डॉक्टरांची गरज आहे,’ असे सांगून, त्या रात्रीच रुग्णालयात दाखल करण्यासाठी नेले. ‘अरे बाळा, मला काहीही झाले नाही. मला येथे दाखल करू नको. मला इतर रुग्णांचा त्रास होईल,’ अशी विनवणी आई मुलाला करू लागली. मात्र, त्याने आईचे ऐकले नाही. डॉक्टरांनीही मुलाने सांगितल्याप्रमाणे त्यांना दाखल करून घेतले. वानवडी येथे राहणाऱ्या मुलाच्या मामाला हा प्रकार समजला. त्याने तत्काळ रुग्णालयात धाव घेतली. मात्र, मुलाने मामालाही आईची भेट घेऊ दिली नाही. यामुळे मामाने हा प्रकार हडपसर पोलिस ठाण्यात जाऊन सांगितला. वरिष्ठ पोलिस निरीक्षक सुनील तांबे यांनी रुग्णालयात तत्काळ पोलिस पाठवले आणि आईची तेथून सुटका केली. ‘माझे जगायचे काहीच दिवस राहिले आहेत. कधी काय होईल सांगता येत नाही. मुलापासून माझ्या जीवाला धोका आहे. साहेब, मला वाचवा. मी वेडी नाही,’ अशा शब्दांत त्या मातेने पोलिसांना आवाहन केले.