पडेगाव येतील जिल्हा सामान्य रुग्णालयाच्या परिचर्या प्रशिक्षण केंद्राच्या प्राचार्य किरण जाधव व इन्स्ट्रक्टर सुनीता रायपुरे यांच्यात शुक्रवारी (१२ एप्रिल) दुपारी जोरदार हाणामारी झाले. हे प्रकरण छावणी पोलिसांपर्यंत गेले आहे. दरम्यान, रायपुरे यांनी पोलिसांत जाधव यांनी जीवे मारण्याचा प्रयत्न केल्याची तक्रार दिली आहे.
पडेगाव येथे परिचर्या प्रशिक्षण केंद्र व मुलींचे वसतिगृह आहे. येथे गेल्या काही महिन्यांपासून प्राचार्य व कर्मचाऱ्यांत धुसफूस सुरू आहे. शुक्रवारी दुपारी त्याला पिण्याच्या पाण्यावरून तोंड फुटले. पिण्याचे पाणी कमी पडते त्यामुळे ते तुम्ही वापरू नये, असे म्हणत प्राचार्य जाधव यांनी भांडण उकरून काढल्याचे सुनीता रायपुरे यांनी सांगितले. त्यांनी सफाई कामगार तसलीम शेख यांच्या मदतीने मला मारहाण केली, असेही सांगितले. दरम्यान, छावणी पोलिस ठाण्यात दिलेल्या तक्रारीमध्ये प्राचार्या जाधव या सतत अपमानजनक बोलतात, असेही नमूद करत शुक्रवारी झालेला घटनाक्रम व प्रशिक्षण केंद्रातील यापूर्वी झालेल्या कुरबुरीचा उल्लेख करत जीवे मारण्याचा प्रयत्न केल्याचे म्हटले आहे. ‘मी वरिष्ठ असल्याने भविष्यात प्राचार्य होऊ शकते यावरून कट करून मारहाण केली,’ असे रायपुरे यांनी सांगितले. त्या इतर कर्मचारी व विद्यार्थिनींना धमकावत असतात, असा आरोपही त्यांनी केली. या प्रकारामुळे विद्यार्थिनींमध्ये मात्र घबराट पसरली आहे. गेल्या दोन वर्षांपासूनच्या या बेबनावामुळे विद्यार्थिनी वैतागल्या आहेत.
पोलिस आयुक्तालयात प्राचार्यांची धाव
दरम्यान, प्राचार्य किरण जाधव यांची बाजू माहित करून घेण्याचा प्रयत्न केला असता, त्यांच्याशी संपर्क होऊ शकला नाही. घटनेनंतर रायपुरे छावणी पोलिस ठाण्यात, तर प्राचार्य जाधव या पोलिस आयुक्तालयात गेल्याची माहिती मिळाली.