यंदा राज्यात पाऊस आणि थंडीची चुणूक अनपेक्षित पद्धतीने दिसली. दोन महिन्यांत धो-धो कोसळलेला पाऊस आणि लांबलेली थंडी यामुळे तसा मुंबईकरांना थेट फरक पडला नसला तरी याचे परिणाम आता मुंबईकरांसह सगळ्यांनाच सहन करावे लागणार आहेत. गुढीपाडव्यानंतर हळुहळू घरोघरी दाखल होणाऱ्या आंब्यावर हवामान बदलाचा परिणाम होणार आहे. कोकणात आंब्याचे यंदा केवळ ३० ते ३२ टक्केच उत्पादन झाले आहे.
‘यावर्षी आंब्याला तीन वेळा मोहोर आला. आंब्याला मोहोर येण्याची नियमित प्रक्रिया नोव्हेंबर-डिसेंबरपासून सुरू होते. यावर्षीही याची चांगली सुरुवात झाली, मात्र महिना-दोन महिन्यांनी लगेच पुन्हा नवा मोहोर यायला लागला. त्यामुळे आधीचे तयार होऊ घातलेले आंबे गळायला सुरुवात लागले’, अशी माहिती महाराष्ट्र राज्य आंबा उत्पादक संघाचे अध्यक्ष चंद्रकांत मोकल यांनी दिली. फेब्रुवारीमध्ये हळुहळू कमी होणारी थंडी मार्चअखेरीपर्यंत लांबली. या कालावधीत तिसऱ्यांदा झाडांना मोहोर आला. परिणामी रायगडच्या अनेक बागांमधील कैऱ्या काळ्या पडल्या. हीच परिस्थिती काही प्रमाणात सिंधुदुर्ग, रत्नागिरीतही निर्माण झाली. अनेक ठिकाणी दव पडल्याने आंब्यावर काळे डाग पडले आहेत. मार्चच्या शेवटच्या आठवड्यात ३८ अंशांवर पोहोचलेल्या तापमानानेही आंबा उत्पादनावर परिणाम झाला आहे, असे महाराष्ट्र राज्य आंबा उत्पादक संघातर्फे सांगण्यात येत आहे.
१००० रु. प्रति डझन दर
‘आतापर्यंत बाजारात केवळ २० ते २२ हजार आंब्याच्या पेट्या आल्या आहेत. गेल्या वर्षी कोकणातून या कालावधीमध्ये ४० ते ४५ हजार पेट्या आल्या होत्या. घाऊक बाजारात सध्या आंब्याचा भाव ४ डझनच्या पेटीला ४००० रुपये असा दर आहे. गेल्या वर्षी हा दर ३५०० हजार असा होता. मात्र उत्पादन कमी झाल्याने गुढीपाडव्याला आंबा थोडा चढाच असेल’, अशी शक्यता एपीएमसीचे माजी संचालक संजय पानसरे यांनी व्यक्त केली.
थ्रीप्स रोगाचा फटका
हवामान संकटासोबतच शेतकऱ्यांना थ्रीप्स या रोगाचाही सामना करावा लागला. यामध्ये औषध फवारणीचा उपयोग न झाल्याने शेतकऱ्यांनी माघार घेतली, अशी माहिती मोकल आणि पानसरे यांनी दिली. यामुळे शेतकऱ्यांचे उत्पादन निम्म्यावर घसरून उत्पादन खर्चात वाढ झाली. १५ एप्रिल ते १० मे या काळात आंब्याची आवक वाढण्याची शक्यता आहे. बाजारामध्ये आंब्याची आवक वाढली की हा नाशवंत माल असल्याने शेतकऱ्याला नुकसान सोसून आंबा विकावा लागण्याची भीती आहे.