झारखंडच्या शिक्षण मंत्री नीरा यादव यांच्या सामान्यज्ञानावर पुन्हा एकदा प्रश्नचिन्ह उभं राहिलं असून आता त्यांनी बिहार हा झारखंडच्या बाजूचा देश आहे, असं म्हटलं आहे.
बिहार निवडणुकांचे पडघम वाजू लागले असून त्याबाबत बोलताना नीरा यादव यांनी आपलं अजब ज्ञान प्रकट केलं. झारखंडमधील भाजप नेते बिहारमध्ये प्रचाराला जाणार का?, असा प्रश्न पत्रकारांनी विचारला असता, बिहार हा आमचा शेजारी देश आहे. भाजप बिहारमध्ये पूर्ण ताकदीने प्रचारात उतरणार आहे. त्यामुळे पक्षाला यश मिळवून देण्यासाठी नक्कीच झारखंडमधील नेते जातील, असे नीरा यादव म्हणाल्या. विशेष म्हणजे बिहार राज्याचा देश असा उल्लेख करणाऱ्या नीरा यांना खुलासा करून आपली चूक सुधारावी असेही वाटले नाही. उलट आपल्या उत्तरानंतर हसत हसतच त्या पुढे निघाल्या.
दरम्यान, माजी राष्ट्रपती ए.पी.जे. अब्दुल कलाम यांना निधनाआधीच श्रद्धांजली वाहण्याचा प्रताप केल्याने नीरा यादव चर्चेत आल्या होत्या. या श्रद्धांजलीवरून सर्वत्र संताप व्यक्त करण्यात आला होता. आता नीराबाईंनी आणखी एक घोडचूक केल्याने विरोधक आक्रमक झाले असून नीरा यांची शिक्षण मंत्रिपदावरून हकालपट्टी करण्यात यावी, अशी मागणी विरोधी पक्षाने केली आहे.