बुधवार पेठेतील रेडलाइट भागामध्ये शनिवारी रात्री पोलिसांनी कोम्बिंग ऑपरेशन केले. त्या वेळी याठिकाणी जबरदस्तीने १८ मुलींकडून वेश्या व्यवसाय करून घेतला जात असल्याचे समोर आल्याची माहिती कळाल्यावर त्या मुलींची सुटका करण्यात आली आहे. या प्रकरणी नऊ कुंटणखाना मालकिणींच्या विरोधात गुन्हा दाखल करण्यात आला आहे.
जहाना महंमद रजा शेख, रूपा अब्दुलखान (रा. माचिस बिल्डींग), मैली टिकातमांग (रा. मर्गीगल्ली), तारा बकतलतमांग (रा. वेलकम बिल्डींग), यास्मीन मोबीन शेख (रा. तिसरा मजला, वेलकम बिल्डींग), शिमला साथमनतमांग (रा. वेलकम बिल्डींग), मुख्तार शेख (रा. कोहिनूर बिल्डींग), काजल गोरे तमांग आणि गंगुबाई कांबळे (रा. बुधवार पेठ) यांच्यावर गुन्हा दाखल करण्यात आला आहे. या नऊ ठिकाणी १८ मुलींकडून जबरदस्तीने वेश्या व्यवसाय करून घेतला जात असल्याचे आढळून आले आहे, अशी माहिती फरासखाना पोलिस ठाण्याचे वरिष्ठ निरीक्षक किशोर नावंदे यांनी दिली.
काही महिन्यांपूर्वीच पोलिस उपायुक्त सुहास बावचे यांनी बुधवार पेठेतील रेडलाइट एरियामध्ये छापे टाकून पाहणी केली होती. या ठिकाणी किती बिल्डींग आहेत, तिथे किती महिला वेश्या व्यवसाय करतात याची सर्व माहिती गोळा केली होती. त्यानंतर बावचे यांना बुधवार पेठेत काही मुलींना जबरदस्तीने आणले गेले असून त्यांच्याकडून वेश्या व्यवसाय करून घेतला जात असल्याची माहिती मिळाली. त्यानुसार स्वतः बावचे यांच्यासह १५ अधिकारी, ७० कर्मचाऱ्यांच्या मदतीने शनिवारी सायंकाळी चार ते सहा दरम्यान कोम्बिंग ऑपरेशन राबविण्यात आले. त्या ठिकाणचा सर्व परिसर पिंजून काढल्यावर नऊ ठिकाणी १८ मुलींकडून जबरदस्तीने वेश्या व्यवसाय करून घेतला जात असल्याचे आढळून आले. या मुलींकडून मिळाणाऱ्या उत्पन्नांपैकी ५० टक्के उत्पन्न घरमालकीण घेत होत्या. पीडित मुलींना कोर्टात हजर करण्यात आले. त्या वेळी कोर्टाने त्यांची हडपसर येथील महिला सुधारगृहात रवानगी केली.