बीड जिल्ह्यातील गेवराई येथे दरोडेखोरांनी एका घरात घुसून वृद्ध महिलेचा मोबाइल चार्जरनं गळा दाबून खून केल्याची धक्कादायक घटना रविवारी रात्री घडली आहे. तसंच घरातील सोन्या-चांदीच्या दागिन्यांसह पाच लाख रुपये किंमतीचा ऐवज लुटून पोबारा केला.
खडकपुरा भागातील खक्का मार्केट परिसरातील एका घरावर रविवारी रात्री दरोडा पडला. दरोडेखोरांनी घरातील सोने व चांदीच्या दागिन्यांसह पाच लाखांचा मुद्देमाल लुटला. तसंच पुष्पाबाई शिवप्रसाद शर्मा या वृद्धेचा मोबाइल चार्जरनं गळा दाबून खून केला. ही घटना सोमवारी सकाळी उघडकीस आली. पोलिसांनी तपासाची चक्रे वेगाने फिरवली असून, दरोडेखोरांच्या शोधासाठी पथक तयार केले आहे.