उपनगरीय मार्गावरील प्लॅटफॉर्म आणि लोकलमधील अंतर धोकादायक ठरल्याने प्लॅटफॉर्मची उंची वाढवण्याचे रेल्वेचे प्रयत्न अजूनही तोकडेच पडत आहेत. हायकोर्टाने प्लॅटफॉर्मची उंची वाढवण्याचे आदेश देऊनही त्याची पूर्तता संथगतीने होत असल्याची जवळपास सर्वच स्टेशनांतील प्रवाशांची तक्रार आहे.
‘मनीलाइफ फाऊंडेशन’ या स्वयंसेवी संस्थेतर्फे सादर करण्यात आलेल्या अहवालात मध्य, पश्चिम, हार्बर मार्गावरील ३० स्टेशनांचा आढावा घेण्यात आला. त्यात ९३ टक्के स्टेशनांवरील प्लॅटफॉर्म आणि लोकलमधील अंतर धोकादायक असल्याचे नमूद करण्यात आले आहे. तर, ५३ टक्के स्टेशनांवरील पादचारी पुलांवर फेरीवाले, भिकारी मोठ्या प्रमाणावर असल्याचे म्हटले आहे. या ठिकाणी एटीव्हीएमचा वापर कमी प्रमाणात असून, स्वच्छतेवर फारसे लक्ष दिलेले नसल्याचेही अहवालात स्पष्ट करण्यात आले आहे. २२ जून ते १६ जुलै कालावधीत हे सर्वेक्षण करण्यात आले होते.
उर्वरीत प्लॅटफॉर्मच्या उंचीवाढीसाठी १५ कोटी रुपयांचा निधी उपलब्ध आहे. आतापर्यंत या कामासाठी ८.५० कोटी रु. खर्च झाले आहेत. ‘मरे’च्या ७५ स्टेशनांवर एकूण २७३ प्लॅटफॉर्म आहेत. त्यात, ८४ सेमीवरून ९० ते ९२ सेमीपर्यंत उंची वाढवण्यात आलेल्या प्लॅटफॉर्मची संख्या २७ आहे. ‘मरे’च्या ३९ स्टेशनांची त्यासाठी निवड झाली असून, त्यासाठी सात कोटी रुपये खर्च झाले आहेत.
दादरची दयनीय स्थिती
‘परे’च्या प्लॅटफॉर्म क्रमांक पाचच्या प्लॅटफॉर्मवर बसवण्यात आलेल्या लाद्या बऱ्याच ठिकाणी उखडल्या आहेत. त्यामुळे प्रवाशांना इथून चालणेही कठीण झाले आहे. तुटक्या लाद्यांमुळे ऐन गर्दीच्या वेळेस प्रवाशांचे प्रचंड हाल होत आहे. परंतु त्या दुरुस्तीसाठी अजून कोणीही लक्ष दिलेले नाही.