रस्त्यावर पडलेली १० रुपयाची नोट उचलायला गेला असताना जवळची २ लाख रुपये रोख असलेली बॅग चोरीला गेल्याची घटना गांधीनगर शहरातील सेक्टर ७मध्ये घडली आहे. याप्रकरणी जहीरुद्दीन शेख यांनी तक्रार दाखल केली असून आरोपींचा शोध सुरु आहे.
जहीरुद्दीन शेख हे गांधीनगरमधील सेक्टर सातचे रहिवाशी आहेत. सेक्टर १६ मधील बँकेतून २ लाख रुपये काढून ते दुचाकीवर घरी परतत होते. यावेळी दोन दुचाकीस्वार समोरून आले आणि तुमचे पैसे खाली पडत आहेत असं त्यांनी शेख यांना सांगितले. शेख यांनी खाली पाहिले असता तिथे १० रुपयांची नोट पडली होती. शेख यांनी दुचाकी बाजूला लावली आणि ती नोट उचलायला गेले. त्या वेळात ते दोन तरुण त्यांची बॅग लंपास करून फरार झाले. तेथील एका वाटसरुने ही माहिती शेख यांना दिली. शेख यांनी सेक्टर ७ पोलीस स्टेशनमध्ये तक्रार दाखल केली असून पोलीस पुढील तपास करत आहेत.