पत्रकार नित्यानंद पांडे याच्या हत्येचा उलगडा झाला असून त्याच्याच कार्यालयात काम करणाऱ्या तरुणीसह दोघांना ठाणे ग्रामीण पोलिसांच्या स्थानिक गुन्हे शाखेने अटक केली आहे. मागील दोन वर्षापासून पांडे या तरुणीवर लैंगिक अत्याचार करत होता. याच रागातून तरुणीने कट रचत साथीदाराच्या मदतीने प्रोटीन ड्रिंकमधून गुंगीचे औषध देऊन कारमध्येच दोरी आणि हाताने गळा दाबून पांडेची हत्या केल्याची बाब चौकशीत निष्पन्न झाली आहे. पांडे याच्या विरुद्ध खंडणीसारखे गंभीर गुन्हे दाखल असल्याची माहिती गुन्हे शाखेचे वरिष्ठ पोलिस निरीक्षक व्यंकट आंधळे यांनी दिली.
मिरारोड येथील स्थानिक पत्रकार असलेला पांडे हा एका मासिकाचा संपादकही असून १५ मार्चला सकाळी घरातून कार्यालयात जाण्यासाठी निघाल्यानंतर अचानक तो गायब झाला. दुसऱ्या दिवशी सायंकाळी भिवंडीतील खार्डी गावातील ओढ्यात पांडे याचा मृतदेह आढळून आल्यानंतर खळबळ उडाली. भिवंडी तालुका पोलिस ठाण्यात खुनाचा गुन्हा दाखल झाल्यांनतर स्थानिक गुन्हे शाखेचे सहाय्यक पोलिस निरीक्षक प्रमोद बडाख आणि त्यांच्या पथकाने समांतर तपास सुरू केला. पोलिसांनी पांडे याच्या कार्यालयात काम करणाऱ्या २४ वर्षीय तरुणीसह सतीश मिश्रा (३४) यांना ताब्यात घेतले. परंतु जबाबात विसंगती असल्याने पोलिसांचा त्यांच्यावर संशय बळावला. अखेर सखोल चौकशीअंती या दोघांनीच कट रचून पांडेची हत्या केल्याची बाब समोर आली. ही तरुणी मागील तीन वर्षांपासून पांडे याच्या कार्यालयात मदतनीस म्हणून काम करत आहे. मुलाखत घेण्याची जबाबदारी या तरुणीवर सोपवली होती. मिश्रा याची प्रिंटींग प्रेस असून या प्रेसमध्ये मासिकाची छपाई करण्यात येत होती. पांडे हा या तरुणीवर मागील दोन वर्षांपासून लैंगिक अत्याचार करत होता. याच गोष्टीचा तरुणीच्या मनात राग होता. याच रागातून तरुणीने मिश्रा याच्या मदतीने हत्येचा कट रचला. रो हाऊस दाखवण्याचे खोटे कारण पुढे करत पांडे याला उत्तनला घेऊन जाण्यासाठी मिश्राच्या कारचा वापर करण्यात आला होता.