माध्यमिक आणि उच्च माध्यमिक मंडळाकडून घेण्यात येणाऱ्या बारावीच्या परीक्षेला सुरुवात होऊन तीन दिवस झाले आहेत. यादरम्यान क्रमश: इंग्रजी, हिंदी आणि मराठीसह प्रादेशिक भाषा विषयांची परीक्षा पार पडली. यातील इंग्रजीच्या पेपरला १८, हिंदीला ५ तर मराठीला १२ अशा विभागातील ३५ कॉपीबहाद्दरांवर कारवाई करण्यात आली आहे.
या कारवाईत जळगाव आघाडीवर आहे. नाशिक आणि नंदूरबार जिल्ह्यात अद्याप एकही कॉपीबहाद्दर पथकांच्या हाती लागलेला नाही. धुळे जिल्ह्यातून चार कॉपी बहाद्दर इंग्रजीच्या पेपरला हाती लागले होते. गेल्या काही वर्षांच्या तुलनेत कॉपी बहाद्दरांचा हा आलेख घटल्याचा दावा बोर्डाच्या अधिकाऱ्यांनी केला आहे. यासाठी मंडळाकडून कॉपीविरोधात राबविण्यात आलेले समुपदेशन अभियान आणि भरारी पथकांची कडेकोट पाहणी यामुळे यंदा मोठ्या प्रमाणावर कॉपीला आळा बसल्याचा मंडळाचा दावा आहे. मात्र, नाशिक विभागात अद्याप जळगावला सर्वाधिक कॉपी केसेस आढळत असल्याने या परिसरातील केंद्रांवरही भरारी पथकांना विशेष लक्ष द्यावे लागणार आहे.