बोईसर पोलिस ठाण्याच्या हद्दीत एका खासगी क्लासला येणाऱ्या विद्यार्थिनीला तिच्याच शाळेत शिकत असलेल्या मनीष तिवारी या विद्यार्थ्याने मैत्री करण्याचे सांगून तिला डहाणू येथे बोलविले होते, परंतु ही बाब त्या विद्यार्थिनीने क्लास चालविणारे शिक्षक रणबीर पासवान यांना दिली असता त्यांनी तिला डहाणूला जाण्यास व त्याच्याशी मैत्री करण्यास मज्जाव केला. ही बाब मनीषला माहिती पडताच त्याने सोबत चार जणांना घेऊन मैत्री कॉम्प्लेक्सच्या तळमजल्यावर येऊन शिक्षकास कमरेला लावलेले रिव्हॉल्व्हर दाखवून ‘तू ज्या विद्यार्थिनीस माझ्यासोबत मैत्री करण्यास मनाई केली आहे, तिला मी या रिव्हॉल्व्हरने मारून टाकतो आणि पुन्हा येथे परत येतो’, असे सांगून निघून गेला.
या गंभीर घटनेची माहिती मिळताच बोईसर पोलिस घटनेच्या ठिकाणी दबा धरून बसले असता, चारजण दोन मोटरसायकलींवरून येऊन खासगी शिक्षकासंदर्भात चौकशी करीत असतानाच त्यांच्यावर पथकातील अधिकारी व कर्मचाऱ्यांनी कौशल्याने झडप घालून पकडले. चारपैकी तिघांकडे तीन रिव्हॉल्व्हर व जिवंत काडतुसे सापडली. या संदर्भात बोईसर पोलिस ठाण्यात भारतीय शस्त्र अधिनियम कलम ३, (२५)प्रमाणे शनिवारी रात्री उशिरा गुन्हा दाखल करण्यात आला असून गंभीर गुन्हा घडण्याआधीच आरोपींना हत्यारांसह पकडून अटक केली आहे. या गुन्ह्यात पोलिस निरीक्षक किशोर जगताप व पोलिस उपनिरीक्षक संदीप पोमण, इमानदार व मेहेंदळे तसेच गुन्हा प्रकटीकरणाचे सहाय्यक पोलिस निरीक्षक गायकवाड, पो. ह. सरदार, पो. ना. कैलास पाटील व विजय ठाकूर, पो. शि. उमेश वरठा यांनी मोलाची कामगिरी केली.