देशभरात लवकरच वीस हजार नव्या पेट्रोलपंपांची भर पडणार आहे. पेट्रोलियम मंत्री धर्मेंद्र प्रधान यांनी २,५८२ पेट्रोलपंपांचे इरादापत्र नुकतेच जारी केले. मंत्रालयातर्फे जाहिरातींच्या माध्यमातून योग्य उमेदवारांनाच पेट्रोलपंप वितरित करण्यात आल्याचा दावा करण्यात आला आहे. या माध्यमातून दोन लाख तरुणांना रोजगार मिळण्याची शक्यता आहे.
‘देशात लवकरच २०,००० पेट्रोलपंप सुरू होणार आहेत. एका पेट्रोलपंपावर दहा या प्रमाणे सुमारे दोन लाख रोजगारांची निर्मिती होण्याची शक्यता आहे. त्यामुळे दोन लाख तरुणांच्या रोजगाराचा प्रश्न निकालात निघण्याची शक्यता आहे,’ असे प्रधान यांनी नमूद केले. केंद्र सरकारच्या या प्रयत्नांमुळे तेल आणि वायू क्षेत्रातील रोजगारांना प्रोत्साहन मिळण्याची शक्यता आहे. पेट्रोलियम मंत्रालयांतर्गत येणाऱ्या इंडियन ऑइल, हिंदुस्थान पेट्रोलियम आणि भारत पेट्रोलियम या कंपन्यांनी गेल्या वर्षी नोव्हेंबरमध्ये ३५ राज्ये आणि केंद्रशासित प्रदेशांमध्ये ७८,४९३ पेट्रोलपंपांची उभारणी करण्यासाठी अर्ज मागवले होते. जानेवारी २०१९ अखेर चार लाख अर्ज प्राप्त झाल्याची माहिती मंत्रालयातर्फे देण्यात आली. पहिल्या टप्प्यात आलेल्या अर्जांवर त्वरित निर्णय घेण्यात आला असून, उर्वरित अर्जांचा निर्णय येत्या चार ते पाच महिन्यात घेण्यात येणार आहे. दरम्यान, लोकसभा निवणुकीचा कार्यक्रम जाहीर झाल्यास आचारसंहितेचेही पालन करण्यात येणार असल्याचे मंत्रालयातर्फे स्पष्ट करण्यात आले. सर्वच पेट्रोलपंप येत्या तीन वर्षांत कार्यान्वित होतील, असेही स्पष्ट करण्यात आले.
सध्या कार्यरत असणाऱ्या पेट्रोलपंपांच्या मालकांनी नव्या पंपांच्या वितरणाला विरोध दर्शवला आहे. नव्याने वितरित करण्यात येणाऱ्या पंपांच्या वितरणामध्ये सरकारने नियम धाब्यावर बसविल्याचा दावा त्यांनी केला आहे. पंप मालकांच्या मते सध्याच्या पेट्रोलपंपांवरील सरासरी विक्री १७० किलोलिटरवरून १४० किलोलिटरवर येऊन पोहोचली आहे. सूत्रांनी दिलेल्या माहितीनुसार तेल कंपन्यांकडून नियोजनबद्ध पद्धतीने पंपांचे वितरण करण्यात येणार आहे. त्यामुळे देशाच्या अंतर्गत भागातही पेट्रोलियम पदार्थ पोहोचण्यास मदत होणार आहे. पेट्रोलियम पदार्थांची मागणी मोठ्या प्रमाणात वाढणाऱ्या जगातील मोजक्याच देशांमध्ये भारताची गणना झाली आहे. देशाची अर्थव्यवस्था सध्या ७ ते ८ टक्क्यांनी वाढत असून, पेट्रोलियम पदार्थांच्या उत्पादनांच्या वाढत्या मागणीमुळे आणखी चार टक्के वाढ होण्याची शक्यता आहे.