पतीला गरम कुकरने मारहाण करणाऱ्या पत्नीला कोर्टाने हिंसाचार न करण्याचे आदेश दिले आहेत. प्रथमवर्ग न्यायदंडाधिकारी एस. एस. मतकर यांच्या कोर्टाने हा निकाल दिला.
संबंधित दाव्यातील पत्नीने पतीविरोधात कौटुंबिक हिंसाचार कायद्याअंतर्गत पोटगीसाठी दावा दाखल केला होता. मात्र, पतीच पत्नीची देखभाल करत होता. त्यामुळे कोर्टाने पोटगीची रक्कम दैनंदिन खर्चात विलीन केली होती. तर पत्नीने दाखल केलेल्या कौटुंबिक हिंसाचाराच्या प्रकरणात ती पुरावा दाखल करू शकली नव्हती. त्यामुळे पतीने अॅड. विजयसिंह ठोंबरे, अॅड. हितेश सोनार आणि अॅड. नीलेश वाघमोडे यांच्यामार्फत तो दावा रद्द करण्याची मागणी करणारा अर्ज केला होता. त्या अर्जाचा राग आल्याने तिने पतीला मानसिक व शारीरिक त्रास देण्यास सुरवात केली होती.
दरम्यानच्या काळात त्यांच्यात वाद झाल्याने पत्नीने गरम कुकर पतीच्या डोक्यात मारण्याचा प्रयत्न केला. प्रसंगावधान दाखवून त्याने बचावाचा प्रयत्न केला होता. कुकर गरम असल्याने त्याचा हाताला दुखापत झाली होती. त्याचा हात फ्रॅक्चर झाला होता. अॅड. विजयसिंह ठोंबरे यांनी ही बाब कोर्टाच्या निदर्शनास आणून दिली. कोर्टाने पतीला मारहाण करणाऱ्या पत्नीला तंबी दिली आहे. कौटुंबिक हिंसाचाराचा हा प्रकार गंभीर आहे. महिलांद्वारे पतीचा छळ करण्यासाठी कायद्याचा दुरुपयोग केला जातो. त्यासाठी कायद्यामध्ये सुधारणा होणे गरजेचे आहे, असे मत अॅड. ठोंबरे यांनी व्यक्त केले.