कॉमेडीचे बादशहा जॉनी लिव्हर आता छोट्या पडद्यावर झळकणार आहेत. नव्या विनोदवीरांचा शोध घेणाऱ्या एका मराठी रिअॅलिटी शोमध्ये ते परीक्षक म्हणून दिसणार असून, त्यांच्यासोबत आणखी दोन मराठी कलाकारही असतील. एक टप्पा आऊट,कॉमेडीचा पाऊट असं या शोचं नाव आहे.
आपल्यावर टाकलेल्या या नव्या जबाबदरीबद्दल बोलताना, जॉन लिव्हर म्हणाले की, ‘मराठी भाषेतला विनोदाचा गोडवा मला भावतो. मराठी भाषा वळवावी तशी वळते. अगदी मोकळेपणानं यातून विनोदनिर्मिती होते. महाराष्ट्राच्या कानाकोपऱ्यातल्या विनोदवरींना यातून एक संधी मिळेल. त्यांचे विनोद पाहून कदाचित मलाही बरंच शिकायला मिळेल.’
हिंदी-मराठी सिनेसृष्टीतल्या अनेक बड्या चेहऱ्यांना टीव्हीचा मोह आवरता येत नाही. त्यात आता जॉन यांची भर पडली आहे. सध्या टीव्हीवर एकामागोमाग एक रिअॅलिटी शो येत आहेत. त्यात कॉमेडी शोची संख्याही बरीच आहे. एक टप्पा आऊट… या नव्या कॉमेडी रिअॅलिटी शोमधून नवनवीन विनोदवीरांचा शोध घेतला जाणार आहे. कार्यक्रमाची संकल्पना थोडी वेगळी असून, मार्च महिन्याच्या सुरुवातीला या शोच्या ऑडिशन्सना सुरुवात होणार असल्याचं कळतंय.