राष्ट्रपिता महात्मा गांधी यांच्या यांच्या स्मतिदिनी त्यांच्या प्रतिमेवर एअर पिस्तुलने गोळ्या झाडणारी हिंदू महासभेची कार्यकर्ती पूजा पांडे आणि तिचा पती अशोक पांडे यांना अखेर अलीगड पोलिसांनी तप्पल येथून अटक केली आहे. मंगळवारी रात्री दिल्लीहून नोएडात प्रवेश करताना पोलिसांनी दोघांना अटक केली.
महात्मा गांधी यांच्या ७१ व्या पुण्यतिथीनिमित्त देशभरातून आदरांजली वाहिली जात असताना हिंदू महासभेच्या कार्यकर्त्यांनी मात्र महात्मा गांधीच्या प्रतिमेवर एअर पिस्तूलने गोळ्या झाडल्या होत्या. त्यानंतर त्यांच्या प्रतिमेचे दहनही केले होते. इतकेच नाही, तर त्यानंतर नथुराम गोडसे यांच्या छायाचित्रावर पुष्पहार अर्पण करत मिठाई देखील वाटण्यात आली होती. या प्रकरणी पोलिसांनी गांधी पार्क येथे पूजा आणि अशोक यांच्यासह १० जणांवर गुन्हा दाखल केला होता. त्यानंतर पोलिसांनी या प्रकरणी ७ जणांना अटक केली होती. पूजा आणि तिचा पती अशोक मात्र फरार झाले होते. दोघांनीही कोर्टात समर्पण याचिका दाखल केली होती. मात्र पोलिसांसमोर येण्याऐवजी दोघांनी पोलिसांना चकवा देत कुंभमेळ्यात आमाव्यस्येला संगमावर स्नान करण्याची घोषणा केली होती.
आपण अलाहाबादमध्येच आहोत असे भासवत दोघांनी पोलिसांना सतत गुंगारा देण्याचा प्रयत्न केला. परंतु, पोलिसांची सर्व्हिलन्स टीम दोघांचे मोबाइल फोन लोकेशन ट्रेस करण्याच्या कामी लागली होती. दोन दिवसांपूर्वी दोघे हरियाणात असल्याचे पोलिसांना समजले. त्यानंतर अलीगड पोलिसांनी आपली टीम हरियाणाला रवाना केली. पोलीस त्यांच्या मागावर होते. त्यानंतर दिल्लीतून नोएडात प्रवेश करताना पोलिसांनी त्यांना अटक केली. आज ( बुधवार) त्यांची चौकशी केली जाणार आहे.
महात्मा गांधी यांच्या प्रतिमेवर गोळ्या झाडल्यानंतर, महात्मा गांधींना राष्ट्रपिता संबोधणे अयोग्य आहे. जर मी नथुराम गोडसेच्या आधी जन्मला आले असते, तर मीच महात्मा गांधी यांची हत्या केली असती, असे आक्षेपार्ह वक्तव्यही पूजा पांडे हिने केले होते. या घटनेनंतर देशभरात सर्व स्तरातून निषेधाचे सूर उमटले होते.