पंढरपूरमधील हायप्रोफाइल कुटुंब म्हणून ओळख असलेल्या विरधे यांच्या सूनेने बॅंक अधिकारी सासरा व प्राध्यापिका सासूवर हुंड्यासाठी छळाचा गुन्हा दाखल केला आहे. सायली सिद्धिविनायक विरधेने सासरच्या मंडळीविरोधात पंढरपूर शहर पोलिसात तक्रार दाखल केली आहे. पती सिद्धिविनायक उमेश विरधे हा नपुंसक असल्याचा धक्कादायक आरोपही तिने केला आहे. तसंच लग्नाच्या दुसऱ्या दिवसापासून आपल्याला मानसिक व शारीरिक त्रास देण्यात येत असल्याचं तिने पोलिसांना सांगितलं.
केवळ स्वतःचं नंपुसकत्व लपवण्यासाठी ठार मारण्याच्या धमक्या नवरा देत होता. त्याचे वडील उमेश विरधे, आई उज्ज्वला विरधे, नणंद प्रियांका बट हे त्याला असं वागण्यास प्रवृत्त करत होते, असं तिने तक्रारीत म्हटलं आहे. आम्हाला नोकरी करणारी मुलगी हवी होती. तसंच पुण्यात फ्लॅट घेण्यासाठी माहेरुन पैशाची मागणी करावी, असा तगादा त्यांनी लावला होता. सर्व माहिती सायलीने आपल्या आई-वडिलांना दिली. त्यांनी विरधे कुटुंबीयांकडे विचारणा केली. आमचा मुलगा पांढऱ्या कावीळने आजारी आहे. त्यामुळे हायपरटेन्शनमुळे त्याला मनोविकाराने ग्रासले आहे. त्यावर उपचार सुरू आहेत, असं मोघम उत्तर विरधे कुटुंबीयांकडून देण्यात आलं. सायलीने काही दिवस व्यतीत केल्यानंतरही एक दिवस सिद्धिविनायकने तिच्या पोटात लाथ मारली. या घटनेनंतर सायलीच्या आई-वडिलांनी तिला माहेरी आणले. या प्रकरणामध्ये सायलीने सासरच्या मंडळींवर मुलगा नपुंसकत्व असलेला माहीत असूनही लपवणे, पतीचे दुसरे लग्न लावून देऊ असे धमकावणे, उपाशी ठेवणे, दमदाटी करणे, फ्लॅट घेण्यासाठी वारंवार पैशाची मागणी करणे, असे आरोप केले आहेत. या प्रकरणात पोलिसांनी कलम ४९८-अ, ४१७, ३२३, ५०४, ५०६ प्रमाणे गुन्हा नोंदविला आहे. फिर्यादी सायली यांचे सासरे उमेश विरधे शहरातील नावाजलेल्या बॅंकचे सीईओ आहेत. तर सासू उज्ज्वला विरधे या प्राध्यापिका आहेत. एका हायप्रोफाइल कुटुंबाकडून घडलेल्या घृणास्पद प्रकारामुळे संतप्त प्रतिक्रिया उमटत आहेत.