रिक्षामध्ये राहिलेले प्रवाशाचे तब्बल एक लाख रुपये किमतीचे दागिने कल्याणमधील रिक्षाचालकाने परत केल्याने त्याचे कौतुक होत आहे.
कल्याण पूर्वेकडील सूचक नाका येथून ज्येष्ठ नागरिक परमेश्वर मेनन हे रामचंद्र अमरे यांच्या रिक्षाने प्रवास करत होते. यावेळी ते इच्छित स्थळी ते उतरले, मात्र त्यांच्याजवळ सुमारेक लाखाचे दागिने आणि महत्त्वाची कागदपत्रे असलेली बॅग ते रिक्षातच विसरले. काही वेळानंतर ही बाब रिक्षाचालक रामचंद्र अमरे यांच्या लक्षात आली. यावेळी अमरे यांनी महाराष्ट्र रिक्षा पंचायतचे ठाणे जिल्हाध्यक्ष शिवाजी गोरे यांना हा प्रकार सांगितला. शिवाजी गोरे यांनी लागलीच महात्मा फुले पोलिस ठाण्याचे वरिष्ठ पोलिस निरीक्षक प्रकाश लोंढे यांच्याशी संपर्क करत बॅगेबाबत सांगितले. यावेळी लोंढे यांच्या हस्ते ही बॅग प्रवासी परमेश्वर मेनन यांना सुपूर्द करण्यात आली. रिक्षाचालक रामचंद्र अमरे यांनी ही बॅग परत केली म्हणून त्यांचे सर्वच स्तरांतून अभिनंदन करण्यात येत आहे. दागिने आणि महत्त्वाची कागदपत्रे असलेली बॅग परत मिळाल्याने ज्येष्ठ नागरिक परमेश्वर मेनन यांनी प्रामाणिक रिक्षाचालक रामचंद्र अमरे यांचे आभार मानले.