वाजत…गाजत…ढोल ताशांच्या गजरात…तुतारीच्या निनादात स्वागत होत असलेल्या प्रेक्षकांच्या, शिवसैनिकांच्या उपस्थितीने ‘ठाकरे’ चित्रपटाचा पहाटेचा ‘फर्स्ट डे फर्स्ट शो’ हिट ठरला. बहुचर्चित ‘ठाकरे’ चित्रपट आज देशभरात प्रदर्शित झाला. वडाळ्यातील ‘कार्निव्हल चित्रपटगृहात पहाटे साडे चार वाजताच्या शोसाठी तुडुंब गर्दी झाली होती. ‘फर्स्ट डे फर्स्ट शो’साठी चित्रपटगृह खास सजवण्यात आले होते.
या खास शोसाठी जय्यत तयारीदेखील करण्यात आली होती. दिवगंत शिवसेना प्रमुख बाळासाहेब ठाकरे यांच्यासह अभिनेता नवाझुद्दीन सिद्दीकीचे बाळासाहेबांच्या व्यक्तीरेखेतील मोठे कट्आऊट्स थिएटरमध्ये लावण्यात आले होते. शो सुरू होण्यापूर्वी छत्रपती शिवाजी महाराज यांच्या पुतळ्याला दूधाने अभिषेक करण्यात आला. ढोल ताशांच्या गजरात, तुतारीच्या निनादात प्रेक्षकांचे स्वागत करण्यात आले. चित्रपटगृहात खास ‘शिव वडापाव’ची गाडी लावण्यात आली होती. चित्रपटासाठी वातावरणनिर्मिती करण्याचे प्रयत्न करण्यात आले.
या शोसाठी दिग्दर्शक अभिजित पानसेदेखील उपस्थित होते. बुधवारी रात्री चित्रपटाच्या विशेष स्क्रिनिंगच्या वेळी निर्माते आणि शिवसेना नेते संजय राऊत आणि दिग्दर्शक अभिजित पानसे यांच्यात वाद झाल्याची चर्चा होती. त्यानंतर अभिजित पानसे या शोच्या फर्स्ट डे फर्स्ट शो ला उपस्थित राहिले.
बॉक्स ऑफिसवर ठाकरे आणि कंगणा राणावत ‘मणिकर्णिका’ हे दोन चित्रपट आज प्रदर्शित होत आहेत. ‘ठाकरे’ चित्रपट मराठी आणि हिंदीत प्रदर्शित होणार आहे. ठाकरे चित्रपटात नवाझुद्दीन सिद्दीकी , अमृता राव यांच्या मुख्य भूमिका आहेत. तर, मणिकर्णिकामध्ये कंगणा रनौत झाशीची राणी लक्ष्मीबाईंची भूमिका साकारत आहे. त्यामुळे आता बॉक्स ऑफिसवर कोणता चित्रपट सर्वाधिक कमाई करतोय याची उत्सुकता सिनेप्रेमींना लागली आहे.