चालकाचा बसवरील ताबा सुटल्याने बदलापुरात गुरुवारी एका खासगी शाळेची बस थेट दुकानात शिरल्याची घटना घडली. बदलापूर पश्चिमेकडील गणेश चौक भागात झालेल्या या अपघातात कोणतीही जीवितहानी झाली नाही. मात्र बसचालकाने पलायन केले.
ब्लॉसम या इंग्रजी माध्यमाच्या शाळेची बस गुरुवारी दुपारी दीडच्या सुमारास विद्यापीठ रस्त्याच्या उतारावरून गणेश चौकात येताना चालकाचा बसवरील ताबा सुटला. याबरोबर चालकाने बसमधून उडी घेऊन पोबारा केला. ही बस मंगलज्योत इमारतीतील पूजा साहित्य विक्रीच्या दुकानात शिरली. या घटनेने बसमधील विद्यार्थी भयभीत झाले होते. स्थानिकांनी त्यांना बसमधून उतरवत बाजूला केले. या घटनेची माहिती मिळताच पालकांनी घटनास्थळी धाव घेतली.
दुकानाच्या शेजारी असलेल्या विजेच्या खांबामुळे आणि दुकानाला लावलेल्या लोखंडी जाळ्यांमुळे बस थांबली. त्यामुळे मोठा अपघात टळला. बसचाचालक नवखा असल्याने त्याला वाहनावर नियंत्रण ठेवणे जमले नाही. मात्र बसची इमारतीला लागलेली धडक इतकी जोरात होती की, इमारतीतील दुसऱ्या मजल्यापर्यंत याचे धक्के जाणवले. सायंकाळी उशिरापर्यंत बदलाापूर पश्चिम पोलिस ठाण्यात गुन्हा दाखल झालेला नव्हता.