गुजरातमधील पाटीदार पटेल समाजाचा नेता हार्दिक पटेल येत्या २७ जानेवारीला बोहल्यावर चढणार आहे. हार्दिक हा त्याची बालमैत्रीण किंजल पारीख हिच्याशी विवाहबद्ध होणार आहे. सुरेंद्रनगर जिल्ह्यातील दिगसर गावी अत्यंत साधेपणानं हा विवाहसोहळा पार पडणार आहे.
हार्दिकच्या निकटवर्तीयांनी दिलेल्या माहितीनुसार, या विवाह सोहळ्याचं निमंत्रण केवळ १०० जणांना असेल. त्यात वधुवराचे कुटुंबीय व जवळच्या मित्रमंडळींचा समावेश असेल. विवाहाचे सर्व विधी पटेल कुटुंबीयांचं कुलदैवत असलेल्या बहुचर आणि मेल्दी माता मंदिरात होतील.
हार्दिक आणि किंजल हे अनेक वर्षे अहमदाबाद जिल्ह्यातील विरामगाम तालुक्यातील चंदननगरी परिसरात राहायचे. किंजल ही हार्दिकची बहीण मोनिका हिच्यासोबत शाळेत होती. ती वरचेवर हार्दिकच्या घरी यायची. तिथंच तिची हार्दिकशी ओळख झाली. कालांतरानं या मैत्रीचं प्रेमात रूपांतर झालं. पटेल आणि पारीख कुटुंबीयांमध्येही उत्तम संबंध आहेत. किंजल ही कॉमर्स शाखेची पदवीधर असून सध्या गांधीनगरमधील एका लॉ कॉलेजातून एलएलबी करतेय.
हा आंतरजातीय विवाह नाही!
हार्दिकचे वडील भरत पटेल यांनी या विवाहाबाबत सविस्तर हिती दिली. ‘हार्दिकनं लवकरात लवकर विवाहबद्ध व्हावं अशी आम्हा सगळ्यांचीच इच्छा होती. त्यासाठी ही योग्य वेळ आहे असं वाटल्यानं किंजलच्या आई-वडिलांशी चर्चा करून आम्ही २७ जानेवारी ही तारीख ठरवलीय. किंजलचं आडनाव पारीख असलं तरी हा आंतरजातीय विवाह नाही. किंजल ही पारीख-पटेल असून पाटीदार समाजाचीच आहे’, हे सांगायला ते विसरले नाहीत.