रेशनिंग दुकानांत जायचे ते गहू, तांदूळ, रॉकेल असे जिन्नस आणण्यासाठी, हा आजवरचा शिरस्ता. मात्र रेशन दुकानात जाऊन तुम्हाला तुमच्या बँक खात्यातील रकमेचा तपशील मिळाला तर… इतकेच नाही, तर तेथून तुम्हाला पैसे काढता आले तर? ही अशी सुविधा मिळणे म्हणजे निव्वळ कल्पनांचा खेळ, असे तुमचा समज असेल, तर तो उद्या, मंगळवारपासून खोडला जाणार हे नक्की….
राज्यातील स्वस्त धान्य दुकानदारांमार्फत रेशनिंगच्या ग्राहकांना बँकिंग सुविधेचा लाभ घेता येईल. ही सेवा उद्या, मंगळवारपासून उपलब्ध करून देण्यात येईल, अशी माहिती शिधावाटप नियंत्रक व नागरी पुरवठा संचालक दिलीप शिंदे यांनी पत्रकारांना दिली आहे. येस बँकेचे व्यावसायिक प्रतिनिधी म्हणून रेशन दुकानदारांना काम करता येणार आहे, असे त्यांनी स्पष्ट केले.
रेशन दुकानात अस्तित्वात असलेल्या पॉस मशिनच्या माध्यमातून बँक खात्यातील शिल्लक रक्कम तपासणे, पैसे काढणे आणि इतर मूल्यवर्धित बँकिंग सेवा रेशनिंग व्यवस्थेतील ग्राहकांना मिळणार आहेत. शिधावाटप दुकानदारांमार्फत बँकिंग सेवा देण्याच्या या उपक्रमाचा प्रारंभ प्रभादेवीच्या रवींद्र नाट्य मंदिरात मंगळवारी होईल. त्याच ठिकाणी ग्राहक जागृती संदर्भातील प्रदर्शन भरविण्यात येणार असून, ग्राहक मेळावाही आयोजित करण्यात आला आहे.
यावेळी सार्वजनिक वितरण प्रणालीमधील लाभार्थ्यासाठी झालेले नवीन बदल, ग्राहक संरक्षण परिषद सदस्यांचा क्रियाशील सहभाग, अन्नभेसळ रोखण्यासाठी केलेले विविध उपक्रम, नियमांत आणि अंमलबजावणीमध्ये केलेले ग्राहक हिताचे बदल, वैधमापन शास्त्र कायदा अंमलबजावणीत केलेले ग्राहक हिताचे बदल, राज्य तक्रार निवारण आणि कायद्यातील नवे बदल, या विषयांवर तज्ज्ञांद्वारे उपस्थितांना मार्गदर्शन करण्यात येणार आहे.