मासिक पाळीदरम्यान घराबाहेर, झोपडीत ठेवल्यानंतर गुदमरून एका ३५ वर्षीय महिलेसह तिच्या दोन मुलांचा मृत्यू झाल्याची धक्कादायक घटना नेपाळमध्ये बाजूरा जिल्ह्यात घडली. या झोपडीला कोणतीही खिडकी किंवा वायूविजनाची सोय नसल्यामुळे ही घटना घडल्याचे सांगण्यात आले. अंबा बोहरा असे मृत महिलेचे नाव आहे.
अंबा हिचा मंगळवारी मासिक पाळीचा चौथा दिवस होता. आपल्या नऊ व बारा वर्षांच्या दोन मुलांसह ती घराबाहेर, या झोपडीत रात्री झोपण्यासाठी गेली. थंडीचे दिवस असल्याने झोपडीत शेकोटी पेटवली होती. मात्र दुसऱ्या दिवशी सकाळी हे तिघेही मृतावस्थेत आढळले. झोपेत असताना शेकोटीमुळे त्यांच्या घोंगडीने पेट घेतला आणि धुरामुळे गुदमरून तिघांचा मृत्यू झाला असावा, असा अंदाज ग्रामस्थांनी वर्तवला. तिघांचेही मृतदेह शवविच्छेदनासाठी पाठवण्यात आले असून तपास सुरू आहे.
भारतातील काही भागांप्रमाणे नेपाळमधील काही भागांतही मासिक पाळीदरम्यान महिलांना अस्पृश्य वागणूक देण्याची प्रथा असून या काळात त्यांना घराबाहेर ठेवले जाते.