पाळीव कुत्र्याला एक छोटासा दगड फेकून मारल्यामुळे संतापलेल्या कुत्र्याच्या मालकाने अफाक नामक इसमाची हत्या केल्याची धक्कादायक घटना ईशान्य दिल्लीतील जनता कॉलोनी परिसरात घडली आहे. आरोपी मेहताब कुटुंबासोबत फरार झाला असून पोलीस त्याचा शोध घेत आहेत.
पोलिसांनी दिलेल्या माहितीनुसार, जनता कॉलोनीत शिवणकाम काम करणारा अफाक रविवारी दुपारी नजीकच्या रुग्णालयात आपल्या मुलाला भेटायला जात होता. अफाक हा मेहताबच्या घरासमोरून जात असताना मेहताबचा कुत्रा त्याच्या अंगावर धावून आला. तेव्हा आत्मसंरक्षणासाठी अफाकने एक छोटासा दगड कुत्र्याच्या दिशेने भिरकावला. दगड लागल्यामुळे कुत्र्याला जखम झाली नाही, पण तो इवळायला लागला. हे पाहून मेहताब घरातून बाहेर आला आणि त्याने आरडाओरडा करायला सुरुवात केली. तेव्हा कोणत्याही वादात न अडकता अफाक मुकाट्याने रस्त्याने पुढे चालायला लागला. पण भडकलेल्या मेहताबने खिशातून पिस्तूल काढले आणि अफाकच्या पाठीत गोळी घातली. अफाक तिथेच कोसळला. अफाकला गोळी लागल्याचे कळताच त्याची तीन मुलं आणि पत्नी घटनास्ठळी पोहोचली. अफाकला लगेच नजीकच्या रुग्णालयात हलवण्यात आलं. पण उपाचारादरम्यान त्याचा मृत्यू झाला. दरम्यान मेहताबने कुत्र्याला घराबाहेर बांधले आणि पळ काढला.
मेहताबने याआधीदेखील अनेक किरकोळ गुन्हे केले आहेत. तसंच कुत्र्यामुळे मेहबताबची अनेकांशी भांडणंही झाली होती. मेहताबचा कुत्रा येणाऱ्या जाणाऱ्या लोकांवर धावून जायचा, अशी माहिती स्थानिकांनी दिली आहे.