एकतर्फी प्रेमातून महिलेची छेडछाडकरणाऱ्या तरुणाला वारंवार समज दिल्यानंतरही तरुणाने छेड काढणे सुरूच ठेवल्याने संतापलेल्या विवाहितेने दोन तरुणांच्या मदतीने या तरुणाला बेदम मारहाण करत त्याचे गुप्तांग कापल्याची धक्कादायक घटना डोंबिवली पूर्वेकडील नांदिवली टेकडी परिसरात घडली. विशेष म्हणजे या
कृत्यानंतर या महिलेने रक्ताच्या थारोळ्यात पडलेल्या तरुणाला स्वत:च रुग्णालयात दाखल करत पोलिसांना माहिती दिली. मानपाडा पोलिसांनी या महिलेसह तिला गुन्ह्यात मदत करणाऱ्या तेजस म्हात्रे (२२) आणि प्रवीण केनिया (२५) या दोघांना अटक केली.
तुषार पुजारे (२७) हा तरुण डोंबिवली पश्चिमेकडील जुनी डोंबिवली परिसरात राहतो. तुषार हा शेजारी राहणाऱ्या ४२ वर्षीय महिलेवर एकतर्फी प्रेम करत होता. यातून वारंवार या महिलेची छेड काढत तो तिच्याशी लगट करण्याचा प्रयत्न करायचा. या महिलेने त्याला वारंवार समजावण्याचा प्रयत्न केला, मात्र तरीही तुषार ऐकत नव्हता. मात्र तुषारने या महिलेच्या पतीला भेटून आपले तिच्यावर प्रेम असून आपल्याला तिच्याशी लग्न करायचे असल्याचे सांगितले. यामुळे या महिलेचे आणि तिच्या पतीचे कडाक्याचे भांडण झाले. यामुळे संतापलेल्या महिलेने तुषारचा काटा काढायचा डाव रचला. तुषार खासगी कंपनीत कर्ज विभागात काम करत असल्याने तिने तेजस आणि प्रवीण या दोघांना कर्जासंदर्भातील माहिती देण्यासाठी बोलविण्यास सांगितले. डोंबिवली पूर्वेकडील नांदिवली टेकडी परिसरात मंगळवारी रात्री पावणेनऊ वाजण्याच्या सुमारास तुषार पोहोचला असता या तिघांनी त्याला काठी, पट्टा आणि ठोशाबुक्क्यांनी मारहाण केली. यात त्याच्या छातीवर, डोक्यावर, मानेवर खोल जखमा झाल्या असून त्याच्या मेंदूला गंभीर इजा झाली आहे. यानंतर त्या दोन तरुणांनी तुषारला पकडून ठेवले तर या महिलेने धारदार चाकूने त्याचे गुप्तांग कापले. यानंतर याच महिलेने त्याला रुग्णालयात दाखल करत केलेल्या कृत्य्याची कबुली डॉक्टरांना दिली. जखमी तुषारवर डोंबिवलीतील एम्स रुग्णालयात उपचार सुरू आहेत. मोठ्या प्रमाणात झालेला रक्तस्राव आणि मेंदूला झालेली इजा यामुळे त्याची प्रकृती अतिशय गंभीर असल्याचे एम्स रुग्णालयाचे डॉक्टर मिलिंद शिरोडकर यांनी सांगितले.