अकोल्यापासून १५ किलोमीटर अंतरावर असलेल्या गायगाव येथील प्रसिध्द गणेश मंदिरातील गणपतीच्या मुर्तीला ख्रिसमससाठी सांताक्लॉजचे कपडे घालून सजविण्यात आल्याने एकच खळबळ उडाली आहे. हे गणपती मंदिर राजू अग्रवाल यांचे खासगी मालकीच्या शेतात आहे. गणपती मुर्तीला हा सांताक्लॉजचा ड्रेस त्यांनी ख्रिसमसच्या निमित्ताने घातला होता. पण त्यामुळे हिंदू धर्मियांच्या भावना दुखावल्या गेल्यामुळे विश्व हिंदू परिषदेचे भरत मिश्रा हे आपल्या कार्यकर्त्यांसह गायगाव येथे पोहचले व त्यांनी धार्मिक भावना दुखावल्याने या प्रकारचा निषेध नोंदविला.
गायगाव येथील गणेश मंदिर अग्रवाल यांच्या खासगी मालकीचे आहे. त्यांनी ख्रिसमसच्या निमित्ताने सहज म्हणून गणेश मुर्तीला सांताक्लाजचा ड्रेस घातला होता, असे त्यांचे म्हणणे आहे. कुणाच्याही भावना दुखावण्याचा त्यांचा उद्देश नव्हता. मात्र हिंदू धर्मियांच्या या प्रकारामुळे भावना दुखावल्याने या प्रकाराचा सर्वत्र निषेध होत आहे.