फीट्स येत असल्याने रुग्णालयात उपचार घेणाऱ्या अल्पवयीन मुलीचा विनयभंग केल्याची घटना कळव्यातील छत्रपती शिवाजी महाराज सरकारी रुग्णालयात घडली. रुग्णालयात काम करणारा सफाई कर्मचारी दिनेश कोळी याच्यावर गुन्हा नोंदविण्यात आला असून पोलिसांनी त्याला ताब्यात घेतले आहे.
फीट्स येत असल्याने उपचार घेण्यासाठी अल्पवयीन मुलीला कळव्यातील छत्रपती शिवाजी महाराज शासकीय रुग्णालयात भरती करण्यात आले. या मुलीवर उपचार सुरू असतानाच रुग्णालयातील सफाई कर्मचाऱ्याने विनयभंग केल्याची तक्रार मुलीकडून दाखल करण्यात आली. वॉर्डातील चादर बदलण्यासाठी आलेल्या ३९ वर्षीय दिनेश कोळी या सफाई कर्मचाऱ्याने विनयभंग केल्याचे यावेळी सिद्ध झाले. याबाबत रुग्णाच्या कुटुंबीयांनी रुग्णालय प्रशासनाकडे धाव घेत संबंधित प्रकाराची माहिती दिली. या प्रकरणी चौकशी करत रुग्णालय प्रशासनाने संबंधित कर्मचाऱ्यावर कारवाई केल्याचे सांगितले आहे. कोळी हा सफाई कामगार कंत्राटी असून त्याच्यावरील गुन्हा सिद्ध होताच त्याला रुग्णालयातून बडतर्फ केल्याची माहिती कळवा रुग्णालय प्रशासनातर्फे देण्यात आली आहे. अशा वागणुकीचे कर्मचारी कामावर असणे योग्य नसून कामावरून बडतर्फे केल्यामुळे रुग्णालय काम करणाऱ्या इतर कर्मचाऱ्यांवरही वचक बसेल असेही रुग्णालय प्रशासनातर्फे सांगण्यात आले.