संपत्तींच्या वादावरून झालेल्या भांडणातून पत्नी आणि मुलीने वाद घातल्यानंतर पत्नीने पतीवर चाकूने वार केल्याची खळबळजनक घटना ठाण्यात घडली आहे. गंभीर बाब म्हणजे मुलीनेही वडिलांना मारहाण केली असून यामध्ये तिचे वडील जखमी झाले आहेत. याप्रकरणी नौपाडा पोलिस ठाण्यात पत्नी, मुलगी आणि मुलगा अशा तिघांविरुद्ध गुन्हा दाखल करण्यात आला आहे.
ठाण्यातील नितीन कंपनी परिसरात रोहाउसमध्ये एकटेच वास्तव्य करणारे व्यापारी ५७ वर्षीय व्यक्तीचा माथेरानला रिसॉर्ट आहे. पत्नी, मुलगा, मुलगी आणि सून अन्यत्र राहत आहेत. २१ डिसेंबर रोजी दुपारी ते दवाखान्यातून घरी आले. त्यावेळी घरी अगोदरच पत्नी, दोन मुले आलेली होती. मात्र वडिलाना आज संपवून टाका असे मुलगा आई आणि बहिणीला बोलून तेथून निघून गेला. जुन्या प्रॉपर्टीच्या वादातून पत्नी आणि मुलीने त्यांच्याशी भांडण करण्यास सुरुवात केली. अर्वाच्य भाषेतही शिविगाळ करत जीवे ठार मारण्याची धमकी दिली. व्यापाऱ्याची तब्येत ठीक नसल्याने व्यापारी भांडणाकडे अधिक लक्ष न देता बेडरूममध्ये आराम करण्यासाठी गेला. मात्र पाठोपाठ पत्नी आणि मुलगी बेडरूममध्ये आली. आणि पत्नी व्यापाऱ्यावर चाकूने वार केला. व्यापाऱ्याने हा वार चुकवण्याचा प्रयत्न केला. मात्र वार चुकला नाही आणि वार डोक्याला लागल्याने डोक्यातून रक्त येऊ लागले. त्यानंतर पत्नीने पुन्हा पतीवर चाकूने वार केला. महिलेच्या हातातील चाकू खाली पडल्यानंतर दोघींनी हाताने आणि लाथांनी व्यापाऱ्याला मारहाण केली. व्यापाऱ्याने आरडाओरडा केला आणि चालकाला बोलवून घेत नौपाडा पोलिस ठाण्यात धाव घेतली.