विलेपार्ले येथील मिठीबाई कॉलेजने आयोजित केलेल्या कार्यक्रमात चेंगराचेंगरी झाली असून यात ८ विद्यार्थी जखमी झाल्याची माहिती समोर आली आहे. मिठीबाई कॉलेजच्या जवळच असलेल्या जशोधा रंगमंदिर येथे हा प्रकार घडला आहे. जखमींना कूपर रुग्णालयात दाखल करण्यात आले आहे. जखमींमध्ये ६ मुलं आणि २ विद्यार्थीनींचा समावेश असून त्यातील तीन विद्यार्थी अतिदक्षता विभागात आहेत.
मिठीबाई कॉलेजच्या बीएमएस विभागाकडून ‘कॉलेजिअम’ या सांस्कृतिक महोत्सवाचं आयोजन करण्यात आलं आहे. या महोत्सवादरम्यान आज विद्यार्थ्यांसाठी खास कार्यक्रमाचं आयोजन करण्यात आलं होतं. कार्यक्रमात रॅप गायकांना निमंत्रित करण्यात आलं होतं. कार्यक्रमासाठीच्या प्रवेशिकांची क्षमता तीन ते चार हजार असतानाही १० हजारहून अधिक प्रवेशिका वाटण्यात आल्या होत्या असा आरोप विद्यार्थ्यांनी केला आहे. तर कार्यक्रमाचं व्यवस्थापन पाहणाऱ्या विद्यार्थ्यांनी जादा प्रवेशिका वाटण्यात आल्या नव्हत्या, असा दावा केला आहे. कार्यक्रमात काही विद्यार्थ्यांनी प्रवेशिका नसतानाही घुसखोरी केल्याने गर्दी वाढल्याचं त्यांनी सांगितलं.
महापालिकेच्या आपत्ती व्यवस्थापन अधिकाऱ्यांच्या माहितीनुसार कार्यक्रमाला सेलिब्रिटी उपस्थित राहणार असल्यानं गर्दी वाढली होती. गर्दीचं रुपांतर चेंगराचेंगरीत होऊन विद्यार्थी जखमी झाले आहेत. सभागृहात क्षमतेपेक्षा अधिक विद्यार्थी उपस्थित असल्याने श्वास कोंडण्यास सुरुवात झाल्याने हा प्रकार घडल्याचं पोलिसांनी घटनेच्या प्राथमिक चौकशीनंतर स्पष्ट केलं आहे. या संपूर्ण प्रकारानंतर कार्यक्रम थांबवण्यात आला आहे.