अंधेरी एमआयडीसीतील कामगार हॉस्पिटलच्या आगीतून डिलिव्हरी बॉयने तब्बल १० जणांचे प्राण वाचवले. सिद्धू हुमनाबडे (वय २०) असं या मुलाचं नाव आहे. सिद्धू हा स्विगीची पार्सल्स डिलिव्हरी करतो. त्याच्यावर सध्या अंधेरीत उपचार सुरू आहेत.
पार्सल्सच्या डिलिव्हरीसाठी सिद्धू सोमवारी बाहेर पडला होता. यावेळी त्याने हॉस्पिटलमधून धूर येत असल्याचं बघितलं. तो लगेचच बचावकार्यात सहभागी झाला आणि त्याने एकूण १० जणांचे प्राण वाचवले. बचावकार्यादरम्यान दोन रुग्णांचा खाली पडून मृत्यू झाला, असं सिद्धू म्हणाला. सिद्धूवर सध्या अंधेरीतील सेव्हन हिल्स हॉस्पिटलमध्ये उपचार सुरू आहेत. बचावकार्यादरम्यान नाकातोंडात धुर गेल्याने त्याला श्वास घेण्यास त्रास होत होता. यामुळे त्याला हॉस्पिटलमध्ये दाखल करण्यात आलं.
हॉस्पिटलच्या तिसऱ्या मजल्यावरील एका खिडकीला लागून मी शिडी लावली. यावेळी एक ज्येष्ठ महिला खिडकीतून शिडीवर येऊ लागली. मी तिला धरलं. पण शिवडीवर येत असताना खिडकीचा कठडा तुटला आणि ती महिला खाली कोसळली. मी काहीच करू शकलो नाही. आगीत अडकलेल्या इतरांनाही वाचवायचं होतं. यामुळे या घटनेनंतरही मी घाबरलो नाही, असं सिद्धू म्हणाला.
पाच मजल्याच्या हॉस्पिटलच्या इमारतीत अग्निशमन दलाच्या जवानांसोबत सिद्धूनेही स्वतःला बचावकार्यात झोकून दिलं होतं. ‘अग्निशमन दलाच्या शिडीचा वापर करून मी दगडाच्या सहायाने काचेची अनेक तावदानं फोडली. खिडकिच्या कठड्यावरून आत शिरून मी लोकापर्यंत पोहोचलो आणि त्यांना बाहेर काढलं’, असं सिद्धूने सांगितलं.
‘बचावकार्य करताना धुराच्या लोळामुळे काहीच दिसत नव्हतं आणि श्वासही घेता येत नव्हता. बचावकार्याला जवळपास तीन तास उलटून गेले होते. यानंतर छातीत दुखत असल्याचं सिद्धूने अग्निशमन दलाच्या जवानांना सांगितलं. मी तोंडावर रुमाल बांधण्याचा प्रयत्न केला. पण त्याला उशीर झाला होता’, असं सिद्धू म्हणाला. यानंतर त्याला हॉस्पिटलमध्ये दाखल करण्यात आलं. १५ तासांच्या उपचारानंतर सिद्धूने काल जेवण केलं. आता त्याची प्रकृती ठीक आहे. तो लवकरच बरा होईल, असं डॉक्टरांनी सांगितलं.
दहावी पास असलेला सिद्धू काकांसोबत अंधेरीत राहतो. यापूर्वी तो ऐरोलीत राहायचा. पण स्विगीमध्ये डिलिव्हरी बॉयची नोकरी मिळाल्याने तो अंधेरीत राहाला आला. ‘आम्ही हॉस्पिटलमध्ये पोहोचलो त्यावेळी सिद्धूला ऑक्सिजन मास्क लावण्यात आला होता. त्याच्यावर उपचार सुरू होते’, असं सिद्धूचा भाऊ चंद्रकांत याने सांगितलं. सिद्धू बचावकार्यात असताना त्याची बाइक आणि त्याचं डिलिव्हरीच्या वस्तू तशाच होत्या. पण त्याचं हेल्मेट चोरलं गेलं, असं चंद्रकांत म्हणाला.