उत्तराखंड सरकारने गायीला राष्ट्रमातेचा दर्जा दिल्यानंतर आता हिमाचल प्रदेश सरकारनेही गायीला राष्ट्रमातेचा दर्जा दिला आहे. धर्मशाला येथे पार पडलेल्या हिवाळी अधिवेशनात काँग्रेस आमदार अनिरुद्ध सिंह यांनी हा प्रस्ताव विधानसभेच्या पटलावर ठेवला तर सत्ताधारी भाजपच्या आमदारांनी त्याला पाठिंबा देऊन तो लगेच पारित केला आहे.
गोरक्षेसाठी सप्टेंबरमध्ये उत्तराखंड सरकारने गायीला राष्ट्रमातेचा दर्जा दिला होता. गोतस्करीला चाप बसवण्यासाठी आणि गोरक्षेच्या दृष्टीकोनातून हा निर्णय घेण्यात आला होता. त्यावर उत्तराखंडमध्ये भरपूर टीका झाली होती. गोशालांची दुरावस्था आणि भाकड गायींना होणारा त्रास यावरून विरोधी पक्ष काँग्रेसने भाजपला घेरले होते. पण हिमाचलमध्ये काँग्रेसच्याच आमदाराने गायीला राष्ट्रमातेचा दर्जा देण्याचा प्रस्ताव मांडला. ‘ गायीच्या धार्मिक महत्त्वापलीकडे सामाजिक महत्त्वही खूप आहे. गायीने संपूर्ण मानव जातीवर उपकार केले आहेत. तेव्हा तिचं संरक्षण करणं हे आपलं कर्तव्य आहे’ असं प्रस्तावकर्ते काँग्रेस नेते अनिरुद्ध सिंह यांनी सांगितलं आहे.
दोन वर्षांपूर्वी गोतस्करी केल्याच्या संशयावरून एका युवकाचा हिमाचल प्रदेशात झुंडबळी घेण्यात आला होता.