प्रदूषण टाळण्यासाठी, झाडे वाचवण्यासाठी छापील बिलांऐवजी ई-बिलांचा पर्याय जास्तीत जास्त अंमलात आणावा या पर्यावरणप्रेमी संस्थांच्या सूचनेनंतर टेलिकॉम रेग्युलेटरी ऑथोरिटीने देशभरातील नागरिकांकडून सूचना आणि हरकती मागवल्या होत्या. छापील बिलांचा पर्याय स्वीकारार्ह ठरेल का यासंदर्भात अहवाल जारी करून १० डिसेंबरपर्यंत मत व्यक्त करण्याचे आवाहन केले होते. या आवाहनाला प्रतिसाद देत नऊ हजारांहून अधिक ग्राहकांनी ट्रायकडे पत्रे पाठवली आहेत.
ट्रायमधील अधिकाऱ्यांनी नाव न सांगण्याच्या अटीवर दिलेल्या माहितीनुसार सुमारे नऊ हजारहून अधिक ग्राहकांनी ई-बिल पर्यायाला पाठिंबा दिल्याचा अंदाज आहे. याशिवाय इतर राज्यांमधूनही मोठ्या प्रमाणात प्रतिसाद मिळाला. काही परदेशातील नागरिकांनीही या सूचनेचे स्वागत केले आहे. मात्र त्यांच्या मताचा यामध्ये विचार करण्यात येणार नाही.
ट्रायने या माध्यमातून छापील बिले बंद करून सकारात्मक पाऊल उचलले तर ते म्युचुअल फंड, बँका, इतर छापील बिले देणाऱ्या क्षेत्रांसाठी मार्गदर्शक ठरू शकेल. हे ई-मेल, सूचना यावर विचार करण्यासाठी आणखी पंधरा दिवस ते महिन्याभराचा काळ ट्रायला लागू शकतो. त्यानंतर नव्या वर्षामध्ये बिलांसाठी अधिक पर्यावरणस्नेही मार्ग ग्राहकांना मिळू शकतो, अशी आशा व्यक्त करण्यात येत आहे. कागदासाठी लागणारी झाडे, पाणी, तसेच ही बिले पाठवण्याचा खर्च या सगळ्यामध्ये यामुळे बचत होऊ शकते. त्यामुळेही याबद्दल सकारात्मक निर्णयाची आशा निर्माण झाली आहे.
या पाठिंब्यानंतर ट्राय याबाबत सकारात्मक विचार करेल. सिक्कीम, पश्चिम बंगाल, केरळ, कर्नाटक, दिल्ली अशा विविध राज्यांमधील नागरिकांना याबद्दल माहिती पोहोचवण्यात आली होती. ग्राहकांना छापील बिले पाठवणे कंपन्यांसाठी बंधनकारक राहू नये किंबहुना छापील बिलांची गरज व्यक्त केलेल्या नागरिकांनाच तसे बिल पाठवण्यात यावे असे मत सुमारे २५ स्वयंसेवी संस्थांनीही व्यक्त केले आहे.
शुभजीत मुखर्जी संचालक ‘मिशन ग्रीन मुंबई’