राज्यात वाढत्या बोगस पॅथॉलॉजींवर अंकुश नसल्याने रुग्णांची अक्षरशः लूट केली जाते. सर्वसामान्यांच्या आरोग्याला असलेला हा धोका लक्षात घेऊन या बोगस पॅथॉलॉजीवर कारवाई करावी, अशी मागणी महाराष्ट्र पॅथॉलॉजिस्ट असोसिएशन अॅन्ड मायक्रोबायोलॉजिस्ट संघटनेने केली आहे.
मुंबईत सध्या नोंदणीकृत चार हजार पॅथॉलॉजिस्ट आहेत. तर मुंबईतील साधारणतः ७० टक्के पॅथॉलॉजिस्ट अवैधरित्या लॅब चालवतात. महाराष्ट्र पॅथॉलॉजिस्ट असोसिएशन अॅन्ड मायक्रोबायोलॉजिस्ट संघटनेने बोगस पॅथॉलॉजिस्टची माहिती सरकारला दिली आहे, त्यांच्यावर २७ डिसेंबरपर्यंत कारवाई झाली नाही, तर नव्या वर्षात बेमुदत उपोषण करण्याचा इशारा महाराष्ट्र पॅथॉलॉजिस्ट असोसिएशन अॅन्ड मायक्रोबायोलॉजिस्ट संघटनेने दिला आहे.
पॅथॉलॉजिस्टची संख्या पुरेशी नाही, त्यामुळे बोगस पॅथॉलॉजीचे प्रमाण वाढते, हे कारण संबंधित यंत्रणांकडून पुढे करण्यात येते, असे निरीक्षण मायक्रोबायोलॉजिस्ट संघटनेचे अध्यक्ष डॉ. संदीप यादव यांनी नोंदवले. या बेकायदा लॅबमुळे रुग्णांना चुकीचे अहवाल मिळतात, चुकीचे निदान होते, तसेच योग्य निदानास उशीर होतो, या धोक्यांकडे त्यांनी लक्ष वेधले. पॅथॉलॉजिस्टच्या जागा खूप कमी आहेत. या जागा वाढवण्यासाठी सरकार कोणतेच प्रयत्न करत नाही. त्यामुळे महाराष्ट्रात बेकायदा पॅथॉलॉजी लॅब तिपटीने वाढल्या आहे. सरकारच्याच माहितीनुसार, नाशिक जिल्ह्यात ३१८ लॅब बेकायदा आहेत, तर मुंबईतील ७० टक्के लॅब बोगस असल्याचे समोर आले आहे.
बेकायदा पॅथॉलॉजी चालकांवर कारवाई करण्यासाठी राज्य सरकारने मे २०१६मध्ये अध्यादेश काढला होता. मात्र दोनच दिवसांत हा अध्यादेश मागे घेण्यात आला. त्यामुळे हा अध्यादेश तातडीने पुन्हा लागू करावा, अशी मागणी महाराष्ट्र असोसिएशन ऑफ प्रॅक्टिसिंग पॅथॉलॉजिस्ट अॅण्ड मायक्रोबायोलॉजिस्टच्या डॉ. प्रसाद कुलकर्णी यांनी केली आहे.
एमडी पॅथॉलॉजिस्टच्या जागा वाढवाव्यात
मुंबईत ‘एमडी पॅथॉलॉजिस्ट’ या अभ्यासक्रमासाठी फक्त पन्नास जागा असतात. त्यामुळे पॅथॉलॉजी विषयात पदव्युत्तर शिक्षण घेतलेले मेडिकल कौन्सिलकडे नोंदणीकृत डॉक्टर लॅबमधील अहवाल देऊ शकतात, असे सर्वोच्च न्यायालयाने स्पष्ट केल्यानंतरही बेकायदा व्यवसाय चालवणाऱ्या लॅबवर कारवाईसाठी कायदा करावा, अशी मागणी डॉ. कुलकर्णी यांनी केली आहे. त्याचप्रमाणे वैद्यकीय अभ्यासक्रमातील या जागा वाढवाव्यात, याकडे त्यांनी लक्ष वेधले आहे.