घरातील काम करत नाही म्हणून आईनेच ११ वर्षाच्या मुलाला बेदम मारहाण करून हिटरने चटके दिल्याचा धक्कादायक प्रकार कात्रज येथे समोर आला आहे. या प्रकारानंतर आई मुलाला कात्रज येथील चौकात सोडून निघून गेली आहे. एका संस्थेने हा प्रकार उघडकीस आणला आहे.
या प्रकरणी ३४ वर्षीय आईसह दोघांवर सिंहगड रोड पोलिस ठाण्यात गुन्हा दाखल करण्यात आला आहे. लहान मुलांविषयक काम करणाऱ्या संघटनेने हा गुन्हा उघडकीस आणला असून, संस्थेच्या वतीनेच फिर्याद देण्यात आली आहे. पोलिसांनी दिलेल्या माहितीनुसार, शिवाजीनगर भागातील एका संस्थेच्या हेल्पलाइन क्रमांकावर आई मुलांना हिटरने चटके देत असल्याची माहिती नोव्हेंबर महिन्यात मिळाली. त्यानंतर संस्थेतील व्यक्तींनी सात डिसेंबरला मुलाची आणि त्याच्या वडिलांची भेट घेतली. संबंधित मुलाची आई आणि वडील विभक्त राहतात. दिवाळीच्या सुट्टीनिमित्त आई या मुलाला आणि त्याच्या भावाला घरी घेऊन गेली होती. मात्र, ती मुलांकडून घरातील सर्व कामे करून घेत होती. काम न केल्यास त्यांना काठीने मारहाण करत होती. अनेकदा हिटरनेही चटके दिले आहेत. तसेच, मारण्याची धमकीही दिली होती. आरोपी महिला मुलांना उपाशी ठेवून घरात कोंडून ठेवत असे आणि स्वत: फिरायला बाहेर जात होती. हा संपूर्ण प्रकार चार नोव्हेंबर ते पाच डिसेंबर या कालावधीत घडला आहे. सिंहगड पोलिस या प्रकरणाचा अधिक तपास करत आहेत.