उज्ज्वल जीवनाच्या भविष्यासाठी अशी जाहिरातबाजी करत पोलिस, सैन्य भरतीपूर्वी प्रशिक्षण देणाऱ्या ठाण्यातील भोसले अॅकॅडमी दोन संचालकांना पोलिसांनी फसवणुकीच्या गुन्ह्यात अटक केली आहे. रेल्वेत तिकीट तपासनीस म्हणून नोकरी लावतो असे सांगून आरोपींनी एका तरुणीची चार लाखांची फसवणूक केली असून आणखीही उमेदवारांना गंडा घातला असल्याची शक्यता पोलिस अधिकाऱ्यांनी व्यक्त केली आहे.
भोसले अॅकॅडमीची शाखा ठाण्यातील खारटन रोडवर असून या शाखेत वागळे इस्टेटमधील श्रीनगर भागात राहणाऱ्या २६ वर्षीय तरुणीने पोलिस भरतीपूर्व प्रशिक्षणासाठी प्रवेश घेतला होता. अॅकॅडमीतर्फे पोलिस तसेच इतर भरतीबाबत मार्गदर्शनही केले जाते. प्रशिक्षण चालू असताना मध्येच आरोपींनी तरुणीला रेल्वे तिकीट तपासणी या पदावर नोकरीला लावण्याचे आमिष दाखवले. मात्र नोकरीसाठी १५ लाखांची मागणी केली होती. परंतु तरुणीकडे इतके पैसे नव्हते. त्यामुळे साडेसात लाख रुपये देण्याचे ठरले होते. त्यानुसार तरुणीने चार लाखांचा चेक आरोपींना दिला. उर्वरित पैसे नंतर दिले जाणार होते. चार लाखांचा धनादेश आरोपी जोत्स्ना सोळसकर (४०) हिच्या नावाने वटवण्यात आला होता. भोसले अॅकॅडमीमध्ये जोत्स्ना हिच्यासह संजय रामचंद्र भोसले हाही संचालक असल्याची माहिती पोलिस अधिकाऱ्यांनी दिली. पैसे घेऊनही तरुणीला रेल्वेत टीसीची नोकरी मिळाली नाही. तरुणीने नंतर ठाणेनगर पोलिस ठाण्यात तक्रार केली होती. या तक्रारीनंतर सोमवारी संजय आणि जोत्स्ना या दोघांविरुद्ध गुन्हा दाखल करण्यात आला. त्याच दिवशी दोघांना अटकही करण्यात आली. भोसले अॅकॅडमीच्या ठाण्यासह इतरही ठिकाणी शाखा असल्याचे समजते. सध्या ठाण्यातील शाखेत ३० ते ३५ मुले प्रशिक्षण घेत आहे. अॅकॅडमीच्या जाहिरातीमध्ये संजय भोसले हा निवृत्त एनएसजी कमांडो (पॅरा मिलिटरी) असल्याचे नमूद केले जात आहे.