ब्राझिलच्या उत्तर-पू्र्व भागातल्या एका छोट्या शहरात दरोडेखोरांनी बँक लुटताना केलेल्या गोळीबारात १२ जण ठार झाले. शुक्रवारी सकाळी ही घटना घडली. ठार झालेल्यांपैकी ६ पोलीस आहेत.
दरोडेखोरांनी ओलीस धरलेल्यांपैकी पाच जणांचा मृत्युमुखी पडलेल्यांमध्ये समावेश आहे. या पाचपैकी दोन मुले होती. सिआरा राज्यातल्या आतल्या भागात मिलाग्रेस येथील मुख्य रस्त्यावर दोन बँकांच्या शाखांबाहेरील एटीएम हे दरोडेखोर लुटत होते. पोलिसांनी त्यांना रोखलं असता त्यांनी बेछूट गोळीबार केला.
राज्यपालांच्या प्रवक्ताने दिलेल्या प्राथमिक माहितीनुसार, ‘सहा पोलिसांसह १२ जण ठार झाले.’ मिलाग्रेसचे मेयर लायल्सन लँडिम यांनी जी१ या वृत्तवाहिनीला दिलेल्या माहितीनुसार, ओलीस ठेवलेले पाचही जण एकाच कुटुंबातील होते. त्यांची कार जवळच्या एका हायवेवरून या दरोडेखोरांनी हायजॅक केली. गोळीबार झाल्यानंतर या दरोडेखोरांच्या टोळीने काही न घेता दोन व्हॅन्समधून पोबारा केला. नंतर यापैकी एका दरोडेखोराचा मृतदेह पोलिसांना एका गाडीत आढळला. दोन दरोडेखोरांना अटक झाल्याचे वृत्तही एका वृत्तवाहिनीने दिले आहे. पोलीस हेलिकॉप्टरच्या मदतीने या टोळीचा शोध घेत असल्याची माहिती मेयरच्या कार्यालयातून देण्यात आली.