तंबाखूपेक्षा हवा प्रदूषण घातक, देशात ८ पैकी एकाचा मृत्यू

देशात तंबाखूपेक्षाही हवा प्रदूषण अधिक घातक असल्याची धक्कादायक माहिती समोर आली आहे. दूषित हवेमुळे देशात प्रत्येक आठजणांपैकी एकाचा मृत्यू होत असून बाहेरचीच नव्हे तर घरातील हवाही प्रदूषित असल्याचं एका अभ्यासातून आढळून आलं आहे.

इंडियन कौन्सिल ऑफ मेडिकल रिसर्च (आयसीएमआर) या मेडिकल रिसर्च करणाऱ्या सरकारी संस्थेच्या अहवालातून ही धक्कादायक बाब आढळून आली आहे. विशेष म्हणजे भारतात पहिल्यांदाच अशाप्रकारचा अभ्यास करण्यात आला आहे. हवा प्रदूषणामुळे लोकांच्या आयुर्मानावरही परिणाम होत असल्याचं या अहवालात म्हटलं आहे. हवा प्रदूषणाचा देशातील ७७ टक्के लोकांना फटका बसत असून जर शुद्ध हवा मिळाल्यास लोकांचं आयुष्यमान सरासरी ७ महिन्याने वाढत असल्याचं या अहवालात म्हटलं आहे.

तंबाखूच्या सेवन आरोग्यासाठी हानिकारक असून त्यामुळे कँसरसह अनेक असाध्य रोग बळावतात. मात्र नव्या अभ्यासातून तंबाखूपेक्षाही हवा प्रदूषण अधिक घातक असल्याचं आढळून आलं आहे. तंबाखू सेवन करणाऱ्यांपेक्षा हवा प्रदूषणामुळे अनेक लोक आजारी पडत आहेत. गेल्या वर्षी २०१७ मध्ये देशात केवळ हवा प्रदूषणामुळे १७.४ लाख लोकांचा मृत्यू झाल्याचंही या अहवालात नमूद करण्यात आलं आहे. या अभ्यासानुसार तंबाखूपेक्षा हवा प्रदूषणामुळे लोअर रेस्पिरेटरी इन्फेक्शनचं प्रमाण अधिक वाढलं आहे. तंबाखूमुळे यकृताचा कर्करोग होतो. त्यामुळे एक लाख लोकांपैकी ६२ लोकांचा मृत्यू तंबाखू सेवनामुळे होतो, तर ४९ लोकांचा मृत्यू हवा प्रदूषणामुळे होत असल्याचंही दिसून आलं आहे.

धुम्रपान आणि तंबाखू सेवनाचं प्रमाण काही प्रमाणात घटलं आहे. सातत्याने होणाऱ्या प्रबोधनामुळे हे प्रमाण घटलं असल्याचं पब्लिक हेल्थ फाऊंडेशनचे प्रा. ललित डंडोना यांनी सांगितलं. तंबाखूचं सेवन केल्यानंतरच त्याचा व्यक्तीच्या आरोग्यावर परिणाम होतो. पण श्वास तर वारंवार घ्यावा लागतो. त्यात जर हवा प्रदूषित असेल तर त्याचा आरोग्यावर वारंवार परिणाम होत असतो, असंही डंडोना यांनी स्पष्ट केलं.

हवा प्रदूषणामुळे गर्भपाताचा धोका

हवा प्रदूषणामुळे गर्भपाताचा धोका वाढण्याची शक्यता असल्याचंही या अहवालात नमूद करण्यात आलं आहे. अमेरिकेतील युटा विद्यापीठातील एका संशोधनातून ही बाब समोर आली आहे. हवेत अतिसुक्ष्म कण, नायट्रोजन ऑक्साइड आणि ओझोनचं प्रमाण वाढल्यानंतर तीन ते सात दिवसात गर्भपाताचा धोका संभवतो, असं या संशोधनातून समोर आलं आहे.

एक लाख लोकसंख्येमागे एवढ्या लोकांना आजाराचा धोका