भारतीय बँकांना कोट्यवधीला ठकवून इंग्लंडमध्ये फरार झालेला उद्योगपती विजय मल्ल्याने व्याजाऐवजी कर्जाची मुद्दल देण्याची ऑफर भारत सरकारला दिली आहे. तसेच या ऑफरचा आणि ऑगस्टा वेस्टलँड हेलिकॉप्टर घोटाळ्यातील दलाल ख्रिस्तियन मिशेलच्या प्रत्यार्पणाचा काहीही संबंध नसल्याचा खुलासाही केला आहे.
ऑगस्टा वेस्टलँड हेलिकॉप्टर घोटाळ्यातील दलाल ख्रिस्तियन मिशेल याला दुबईतून अटक करण्यात आल्यानंतर विजय मल्ल्याने कर्जाची मुद्दल देतो, पण व्याज देऊ शकणार नाही, अशी ऑफर भारताला दिली होती. मिशेलच्या अटकेनंतर काही तासांतच मल्ल्याने ही ऑफर दिल्याने प्रत्यार्पणाच्या भीतीमुळेच मल्ल्याने ही ऑफर दिल्याची चर्चा सुरू झाली होती. त्यावर मल्ल्याने हा खुलासा केला असून या ऑफरचा आणि मिशेलच्या प्रत्यार्पणाचा काहीही संबंध नसल्याचं म्हटलं आहे.
मल्ल्याने एक ट्विट करून हा खुलासा केला आहे. ‘माझ्या सेटलमेंट ऑफरचा आणि नुकत्याच झालेल्या दुबईतील प्रत्यार्पणाचा संबंध का लावला जातोय? हेच कळत नाही. मी कुठेही असेन पण माझी एकच विनंती आहे की, कृपया पैसे परत घ्या. हे प्रकरण इथंच थांबवावं अशी माझी इच्छा आहे. मला आर्थिक गुन्हेगार म्हणू नये,’ असं ट्विट मल्ल्याने केलं आहे.
दरम्यान, हे प्रकरण अंगलट येत असल्याचं दिसताच मल्ल्या काल नरमला होता. कर्जाची १०० टक्के मुद्दल फेडण्याची तयारी त्यानं दाखवली होती. तसं ट्विट त्यानं केलं होतं. ‘कर्ज फेडण्याबाबत मी कर्नाटक उच्च न्यायालयाला माहिती दिली असून पंतप्रधान नरेंद्र मोदींना पत्रही लिहिलं आहे,’ असं त्यानं ट्विटमध्ये म्हटलं होतं. ‘बँकांनी आणि सरकारनं माझी ऑफर स्वीकारावी,’ अशी विनंतीही त्यानं केली होती.