वाराणसीतील प्रसिद्ध संकटमोचन मंदिर बॉम्बस्फोटाने उडवून देण्याची धमकी देण्यात आली आहे. एका निनावी चिठ्ठीद्वारे ही धमकी देण्यात आल्याने वाराणसीमध्ये खळबळ उडाली असून पोलिसांनी या प्रकरणाचा कसून तपास सुरू केला आहे.
सोमवारी रात्री ही धमकीची चिठ्ठी मिळाल्याचं संकटमोचन मंदिराचे महंत विश्वंभरनाथ मिश्र यांनी सांगितलं. संकटमोचन मंदिरात २००६ पेक्षाही मोठा स्फोट घडवून आणू. आमच्या या धमकीकडे दुर्लक्ष करू नका, अशी धमकी या चिठ्ठीतून देण्यात आल्याचं महंत मिश्र यांनी सांगितलं.
धमकीची चिठ्ठी आल्यानंतर मिश्र यांनी तात्काळ पोलीस ठाण्यात लिखित तक्रार नोंदवली आहे. या चिठ्ठीत जमादार मियाँ आणि अशोक यादव ही दोन नावे आहेत. पोलिसांनी या दोघांवरही गुन्हा दाखल केला असून अधिक तपास करत आहेत. ७ मार्च २००६ रोजी संकटमोचन मंदिर, कँट स्टेशन आणि दशाश्वमेध घाट या ठिकाणी साखळी बॉम्बस्फोट घडवून आणण्यात आले होते. या स्फोटात संकटमोचन मंदिरात ७ आणि कँट स्टेशनमध्ये ११ जणांचा मृत्यू झाला होता. या स्फोटात १०० हून अधिक लोक जखमी झाले होते.