मुंबईत भीक मागणाऱ्यांचा उच्छाद काही कमी नाही. मात्र एका भिकाऱ्याला महिलने चांगलाच हिसका दाखवला आहे. महिलेच्या तक्रारीवरून विनयभंगाचा गुन्हा दाखल करून पोलिसांनी या भिकाऱ्याला बेड्या ठोकल्या आहेत.
हार्बर मार्गावरील किंग्ज सर्कल रेल्वे स्थानकावर काल सायंकाळी साडेचारच्या सुमारास हा प्रकार घडला. लोकलच्या प्रतीक्षेत एक महिला प्लॅटफॉर्मवर बसली होती. त्याचवेळी एका भिकाऱ्याने या महिलेसमोर येऊन पैशांसाठी हात पसरला. महिलेने पैसे देण्यास नकार दिला तेव्हा महिलेच्या अंगाला हात लावत या भिकाऱ्याने तगादा लावला. महिला त्याकडे दुर्लक्ष करत असतानाही भिकाऱ्याने पुन्हा महिलेच्या अंगाला हात लावला. त्यावर महिला संतप्त झाली. मात्र भिकाऱ्याने उलट तिच्यावरच अश्लील टीपण्णी केली.
हा प्रकार लगेचच महिलेने स्टेशन मॅनेजर कार्यालयात जाऊन सांगितला. त्यानंतर पोलिसांना कळवण्यात आले आणि पोलिसांनी किंग्ज सर्कल स्टेशनवरूनच त्या भिकाऱ्याला बेड्या ठोकल्या. या भिकाऱ्याचे नाव गंगाराम निकाळजे असून त्याच्यावर रेल्वे पोलिसांनी विनयभंगाचा गुन्हा दाखल करण्यात आला आहे. आज त्याला रेल्वे न्यायालयात हजर करण्यात येणार आहे.