ही घटना आहे शुक्रवार २७ सप्टेंबरची. बेंगळुरूच्या एचएएल मार्केटमधल्या फिन्स फर फेदर या दुकानाचे मालक प्रदीप यादव यांनी सकाळी दुकान उघडलं तर त्यांना आढळलं की एका महागड्या पोपटासह १६ पक्षी गायब आहेत. विशेष म्हणजे चोरांनी रोख रक्कम किंवा अन्य महागड्या वस्तूंना हातही लावला नव्हता. अन्य एका पिंजऱ्यात २० पक्षी होते, तेही सुरक्षित होते. जो पोपट चोरीला गेला त्याची किंमत ५० हजार रुपये तर इतर पक्ष्यांची किंमत २५ हजार रुपये होती.
यादव यांनी तत्काळ ताडले की चोरांना पक्ष्यांची किंमत ठाऊक होती. यादव म्हणाले, ‘आम्हा प्रोफेशनल बर्ड सेलर्सचा एक व्हॉट्स अॅप ग्रुप आहे. मी तिथे पक्षी चोरीला गेल्याचा मेसेज पाठवला आणि कोणती माहिती मिळताच मला सावध करायला सांगितले.’ यादव यांनी याच दिवशी पोलिसात तक्रारही केली.
दुसऱ्याच दिवशी सकाळी यादव यांना एका बर्ड डीलरकडून मेसेज आला की त्यांनी एक काँगो ग्र पॅरेट खरेदी केला आहे, जो यादव यांच्या काँगो ग्रे पोपटाप्रमाणे दिसतो. त्याने तो ज्या डीलरकडून खरेदी केला त्याच्यामार्फत पोलीस चोरापर्यंत पोहोचले. एका अज्ञात माणसाने ही चोरी केली होती. पण ती पूर्वनियोजित होती आणि चोर यादव यांच्या माहितीतलाच असण्याचा पोलिसांचा कयास आहे.
काँगो ग्रे पॅरेट सिटॅसिडी प्रजातीतला आहे. माणसासारखा हुबेहुब आवाज काढत असल्याने त्याला खूप मागणी असते.