भुताची भीती दाखवून अपहरण करत एका चार वर्षांच्या मुलीवर नराधमाने लैंगिक अत्याचार केले. यातील आरोपी सराईत गुन्हेगार असून तो फरार झाला आहे. ही घटना चिंचवड बिजलीनगर मंगळवारी सायंकाळी घडली.
या प्रकरणी पीडित मुलीच्या वडिलांनी चिंचवड पोलिस ठाण्यात फिर्याद दिली आहे.
पिंपरी-चिंचवड शहरात लहान मुलींवरील अत्याचाराचे प्रकार सुरूच आहेत. वेगवेगळ्या प्रकारची आमिषे दाखवून अत्याचार केले जात असल्याच्या घटना पुढं येत आहेत. पोलिसांनी दिलेल्या माहितीनुसार, मंगळवारी सायंकाळी साडेसहा वाजताच्या सुमारास शेजारी राहणाऱ्यानं चार वर्षीय मुलीला भुताची भीती दाखवून तिचं अपहरण केलं. तिला रेल्वे ट्रॅकच्या दिशेनं नेलं. त्यानंतर तिला मारहाण करून लैंगिक अत्याचार केले. घरी आल्यावर कुठे होती अशी विचारणा तिच्या पालकांनी केली असता तिनं घडलेला प्रकार सांगितला. या घटनेत मुलगी जखमी झाल्यानं तिला वायसीएम रुग्णालयात नेण्यात आलं. मुलीच्या अंगावर जखमा झालेल्या आहेत. लैंगिक अत्याचाराचा प्रकार असल्याचं लक्षात येताच तिला पुढील तपासणीसाठी ससून रुग्णालयात पाठविण्यात आलं. पिंपरी-चिंचवड पोलीस ठाण्यात गुन्हा दाखल करण्यात आला असून पोलीस आरोपीचा शोध घेत आहेत