टेट बँक ऑफ इंडियाच्या लोअर परळ शाखेच्या ४३ लाख ५५ हजार रुपये चोरीच्या प्रकरणात ना. म. जोशी पोलिसांनी बँकेतीलच कॅशिअर हेमंत जाधव (५५) याला नुकतीच अटक केली. विशेष म्हणजे हे पैसे जुगार आणि बारबालांवर उडविल्याची कबुली जाधव याने दिली आहे.
लोअर परळ येथील मॅरेथॉन टॉवरमध्ये
स्टेट बँकेची शाखा आहे. या शाखेत कॅशिअर म्हणून काम करणाऱ्या हेमंत जाधव याच्यावर दैनंदिन रकमेचा हिशेब ठेवण्याची जबाबदारी होती. जमा झालेली रक्कम तिजोरीत ठेवणे आणि त्याची नोंद कम्प्युटर प्रणालीमध्ये करण्याचे काम हेमंत करायचा. १४ सप्टेंबर रोजी हेमंत सुट्टीवर होता. त्याच्या कामाची जबाबदारी एका महिला अधिकाऱ्याकडे देण्यात आली. बँकेचे आर्थिक व्यवहार आटोपल्यानंतर या महिला अधिकाऱ्याने जमा झालेली रक्कम तिजोरीत ठेवली. परंतु कम्प्युटर प्रणालीमध्ये नोंद करीत असताना आधीच्या रकमेत काहीतरी गडबड असल्याचे तिच्या लक्षात आले. तिने याबाबतची माहिती शाखा व्यवस्थापकांना दिली. ३१ मार्च, २०१८पर्यंतचा ताळेबंद योग्य होता. त्यानंतर काही गडबड झाली असावी, असा संशय शाखा व्यवस्थापकांना आला. त्यांनी हेमंत याच्याशी संपर्क साधून १५ सप्टेंबरला बैठक बोलावली. परंतु हेमंतने बैठकीला गैरहजर राहिला. त्यानंतर पोलिसांत तक्रार करण्यात आली. त्यानंतर पोलिसांनी करी रोड येथील घरातून हेमंतला अटक केली. ३१ मार्चनंतर हेमंतने टप्प्याटप्प्याने बँकेतून पैसे चोरल्याचे समोर आले.
व्हॉट्सॲपवरून कबुली
१४ सप्टेंबर रोजी हा प्रकार उघडकीस आल्यावर शाखा व्यवस्थापकाने हेमंतला ४३ लाख ५५ हजार रु.बाबत विचारले. फोनवर तो थातुरमातुर उत्तरे देऊ लागले. मात्र त्याच रात्री त्याने एक व्हिडीओ तयार करून शाखेच्या व्हॉट्सॲप ग्रुपवर प्रसिद्ध केला व रोकड आपणच चोरल्याची कबुली दिली.
रुग्णालये, बारवाल्यांकडून नकार
बँकेतून काढलेली काही रक्कम टाटा रुग्णालय, केईएम रुग्णालय आणि वाडिया रुग्णालयातील गरीब रुग्णांना दान केल्याचे हेमंत जाधव सांगत आहे. तर काही रक्कम मध्य मुंबईतील दोन बारमध्ये उडविल्याचे त्याने सांगितले. पोलिसांनी सर्व रुग्णालय आणि दोन्ही बारमध्ये शहानिशा केली. मात्र पैसे दान केल्याची कोणतीच नोंद रुग्णालयांकडे नाही, तसेच बारवाल्यांनीही हात झटकले.
