इंधन दरवाढ सुरुच असून आज पुन्हा एकदा पेट्रोल आणि डिझेलच्या दरात वाढ झाली आहे. आज पेट्रोल ११ पैशांनी तर डिझेल ५ पैशांनी महागले. मुंबई, पुण्यात पेट्रोलच्या दराने नव्वदी ओलांडली असून लवकरच हे दर शंभरी गाठणार असल्याचे दिसत आहे.
आज मुंबईत पेट्रोलचे दर ९०.०८ रुपये इतके तर डिझेलचे दर ७८ रुपये ६५ पैसे प्रति लिटर इतके झाले आहे. मुंबई पाठोपाठ पुण्यातही पेट्रोल-डिझेलचे दर नव्वद रुपयांच्या पुढे गेले आहेत. पुण्यात पेट्रोल ९० रुपये ८९ पैसे तर डिझेल ७८ रुपये १९ पैसे इतके झाले आहेत. दुष्काळग्रस्त मराठवाड्यातील परभणीत तर पेट्रोलच्या दराने ९१.८२ रुपयांचा आकडा पार केला असून लवकरच ते शंभर रुपयांवर पोहोचण्याची शक्यता आहे. राज्यातील इतर शहरांच्या तुलनेत परभणीत (९१.८२ रुपये प्रति लिटर) सर्वाधिक महाग पेट्रोल मिळत आहे. तर डिझेल (७९.०६ रुपये प्रति लिटर), पुण्यात पेट्रोल (९०.८९ रुपये प्रति लिटर), नागपूरमध्ये पेट्रोल (९०.५६ रुपये प्रति लिटर) तर औरंगाबादमध्ये पेट्रोल (९१.१३ रुपये प्रति लिटर), तर, राजधानी दिल्लीत आज पेट्रोलचा दर ८२.७२ रुपये आणि डिझेलचा दर ७४.० रुपये प्रतिलिटरवर पोहोचला आहे.