अंबरनाथ येथील एका डॉक्टर महिलेचा सासरच्या मंडळींकडून हुंड्यासाठी शारीरिक आणि मानसिक छळ होत असल्याचा प्रकार उघड झाला आहे. संबंधित महिलेचा पतीही डॉक्टर असून रुग्णालयाचे कर्ज फेडण्यासाठी पीडित महिलेकडून तब्बल २० लाख रुपयांच्या हुंड्याची मागणी करण्यात आली आहे. या प्रकरणी डॉक्टर महिलेने दिलेल्या तक्रारीवरून शिवाजीनगर पोलिस ठाण्यामध्ये सासरच्या सहा व्यक्तींविरोधात गुन्हा दाखल करण्यात आला आहे.
अंबरनाथ पूर्व भागातील रॉयल पार्क नवरेनगर या भागात एका उच्चशिक्षित कुटुंबात पेशाने डॉक्टर असलेल्या सूनेलाच हुंड्यासाठी उच्चशिक्षित सासरच्या मंडळींकडून क्रूर वागणूक देण्यात आली असल्याचे समोर आले आहे. भिवंडी महापालिकेच्या रुग्णालयामध्ये डॉक्टर असलेली ही महिला आपल्या सासरच्या मंडळींसोबत राहतात. त्यांचे पती रूपेश हे बदलापूर येथे दातांचे डॉक्टर आहेत. मात्र गेल्या काही दिवसांपासून रूपेश, सासू आणि सासरे यांच्याकडून पीडित महिलेकडे रुग्णालयाचे कर्ज फेडण्यासाठी २० लाख रुपयांच्या हुंड्याची वारंवार मागणी होत होती. मात्र सासरच्या मंडळींच्या या मागणीला त्यांनी नकार दिला होता. त्यामुळे त्या गोष्टीचा राग मनात धरून पिडित महिलेला घरातील पडदे लावण्याच्या रॉडने पती रूपेश यांनी मारहाण केली. तसेच त्यांच्या हाताला चावाही घेतला. या मारहाणीत त्यांच्या दोन्ही पायांच्या बोटांना जखमा झाल्या असून, त्यांच्या शरीरावरील इतर भागातही डॉक्टर पती यांच्याकडून गंभीर मारहाण करण्यात आल्याचा आरोप त्यांनी केला आहे. तसेच पीडित महिलेची नणंद गायत्रीनेही तिचे हात बांधून तिला मारहाण केली आहे. तसेच जबरदस्तीने कपडे धुण्यासाठी वापरल्या जाणाऱ्या साबणाचे पाणी पिण्यास प्रवृत्त करत शारीरिक आणि मानसिक छळ केला.
या प्रकरणी पीडित महिलेने शिवाजीनगर पोलिस ठाण्यामध्ये पती रूपेश, सासू मुक्ता, सासरे गंगाधर, नणंद गायत्री, जाऊ आरती आणि दीर राजेश यांच्या विरोधात गुन्हा दाखल केला आहे. मात्र याप्रकरणी अद्याप कुणालाही अटक करण्यात आले नाही.